Бүгін қалалық мәслихат депутаттары Ж. Жаяубаев, Т. Рублев және Я. Савчин «Горняк» шағын ауданындағы автомобиль жолдарын орташа жөндеу жұмыстарының барысымен танысу мақсатында көшпелі бақылау жүргізді. Аталған шағын ауданда жолдарды асфальттау мәселесін тұрғындар депутаттармен кездесулер барысында және өз өтініштерінде бірнеше рет көтерген болатын. Көшпелі тексеруге тұрғын үй-коммуналдық шаруашылығы бөлімінің және мердігер ұйымның өкілдері де қатысты. Мердігер ұйым өкілдерінің айтуынша, кейбір учаскелерде жол жөндеу жұмыстары кәріз желілерін қайта жаңғырту жұмыстарымен қатар жүргізілуде. Бұл белгілі бір қолайсыздықтар туғызады, өйткені жер қазу жұмыстары аяқталғаннан кейін жол төсемінің кейіннен шөгіп кетуіне жол бермеу үшін топырақты қайтадан нығыздау қажет.
Депутаттар орындалып жатқан жұмыстардың сапасына, құрылыс стандарттарының сақталуына және мердігер ұйымның кепілдік міндеттемелеріне ерекше назар аударды.
Сонымен қатар, көшпелі тексеру барысында РТИ әскери бөлімінің маңындағы мұсылман зиратына апаратын жол да қаралды. Ауыр жүк көліктерінің тұрақты қозғалысы салдарынан жолдың жабындысы қатты бүлінген: асфальт бұзылып, жолдың кейбір бөліктері шөгіп кеткен, бұл көлік қозғалысын қиындатып отыр. Осы мәселе бойынша қала тұрғындары депутаттарға бірнеше рет жүгінген. Талқылау барысында депутаттар қалалық бюджетті нақтылау кезінде аталған жолды (ақ тас жолды) қиыршық таспен төсеуге қаражат қарастыруды ұсынды. Өз кезегінде тұрғын үй-коммуналдық шаруашылығы бөлімінің өкілдері жақын арада жолды грейдермен тегістеу жұмыстары жүргізілетінін хабарлады.
Көшпелі тексеру барысында қаралған барлық мәселелер депутаттардың бақылауына алынды.
Ақпарат көзі : https://www.gov.kz/memleket/entities/maslihat-karaganda-saran/press/news/details/1252864?lang=ru
Жауап қалдыру