Қ.А.Ясауи атындағы Халықаралық қазақ-түрік университетінде заң факультетінің түлектеріне диплом тапсыру рәсімі өтті. Іс-шараға қонақ ретінде Түркістан облысы Полиция департаменті бастығының орынбасары Б.Зиятаев, Тергеу басқармасының бастығы М.Сейділдаев және Анықтау басқармасының бастығы С.Тұрмановтар барды.
Кездесу барысында полицейлер жас түлектердің оқуын сәтті аяқтауымен құттықтап, полицияда қызмет өткерудің мүмкіндіктері, әлеуметтік кепілдіктер, кәсіби өсу перспективалары мен ІІМ жүйесінде жұмыс істеудің артықшылықтары туралы жеткізді.
Болашақ заңгерлерге ІІО қызметіне кіру тәртібі мен кандидаттарға қойылатын талаптар түсіндірілді, сондай-ақ бүгінгі күні полиция заманауи құқықтық білімі бар сауатты және білікті мамандарды тартуға мүдделі екенін атап өтті.
Тәртіп сақшылары полициядағы қызмет тек жауапты мамандық емес, сонымен қатар қоғамдық қауіпсіздікті қамтамасыз етуге, заңдылық пен құқықтық тәртіпті нығайтуға күн сайын үлес қосу мүмкіндігі екенін жеткізді.
Кездесу соңында полиция басшылығы түлектердің университетте алған білімі мен кәсіби дайындығы ел игілігі үшін табысты қызмет етудің негізі болатынына сенім білдіре отырып, ішкі істер органдарының қатарын толықтыруға шақырды.
Естеріңізге сала кетейік, Полиция департаменті мен Халықаралық қазақ-түрік университеті арасында «дуалды» оқыту жүйесі аясында ынтымақтастық туралы меморандумға қол қойылған. Тығыз өзара іс-қимылдың арқасында болашақ мамандар теориялық дайындықты ғана емес, сонымен қатар Ішкі істер органдарында одан әрі қызмет ету үшін қажетті практикалық тәжірибені де алады.
Ақпарат көзі : https://www.gov.kz/memleket/entities/mvd-turkistan/press/news/details/1250704?lang=ru
Жауап қалдыру