Қарағандыдағы «Salauat Fest»: Есірткіге қарсы ауқымды форум жүздеген белсенді азаматтың басын қосты. 26 маусым – Халықаралық нашақорлыққа қарсы күрес күніне орай Қарағанды облысы салауатты өмір салтын насихаттаудағы ұстанымын тағы бір мәрте айқын көрсетті. Облыстық Полиция департаментінің бастамасымен өткен есірткіге қарсы күрес және есірткі қылмыстарының алдын алу айлығы «Salauat Fest» жастар форумымен қорытындыланды. Қарағанды облысы Полиция департаментінің Есірткі қылмысына қарсы іс-қимыл басқармасы, қала әкімдігінің Ішкі саясат бөлімі, Жастар ресурстық орталығы және «Қарағанды облысының кәсіпкерлер қауымдастығы» қоғамдық бірлестігінің қолдауымен ұйымдастырылған ауқымды іс-шара саябақ алаңына жүздеген тұрғынды жинады. Халықаралық датаға орай өткізілген форум ашық пікір алмасу мен жастардың белсенді қатысуына арналған маңызды алаңға айналды. Ұйымдастырушылар әрбір қатысушының қызығушылығына сай түрлі интерактивті алаңдарды ұсынды. Заманауи Showtoday және жасанды интеллект негізіндегі фотобудкалар, армрестлинг пен фристайл-футбол секілді спорттық сайыстар жастардың ерекше қызығушылығын тудырды. Сондай-ақ қатысушылар киімге ерекше принт түсіру мүмкіндігін пайдаланып, медициналық пунктте кеңес алып, экспресс-тесттерге қол жеткізді. Бұдан бөлек, Aerofit club қызметімен танысып, Төтенше жағдайлар департаменті мен Полиция департаментінің арнайы техникасын, сондай-ақ автокөлік және мотоцикл көрмесін тамашалады. Мұның барлығы мерекелік әрі мазмұнды атмосфера қалыптастырды. Форум аясындағы маңызды сәттердің бірі – есірткі құқық бұзушылықтарының алдын алу жөніндегі қоғамдық кеңес мүшелерін марапаттау рәсімі болды. Марапаттарды Қарағанды облысы Полиция департаменті бастығының бірінші орынбасары Қуаныш Орынбетов табыстады. Бұл қоғам белсенділерінің еңбегіне көрсетілген құрмет қана емес, есірткіге қарсы күрестегі мемлекеттік органдар мен қоғамның өзара ынтымақтастығының маңызын айқындады. Іс-шара бағдарламасы мазмұнды әрі алуан түрлі болды. Қала тұрғындары мен қонақтары шығармашылық және спорттық ұжымдардың өнерін тамашалады. Әсіресе, Полиция департаментінің кинологиялық орталығы қызметтік иттерінің көрсетілімдері мен жедел қимылдайтын арнайы жасақ қызметкерлерінің қойылымдары көрермендердің зор ықыласына бөленді. Форумның шарықтау шегі әсерлі файер-шоуға ұласып, мерекелік кештің жарқын қорытындысына айналды. «Salauat Fest» форумы Қарағанды облысында есірткісіз болашақты қалыптастыру бағытындағы жұмыстардың жүйелі түрде жүргізіліп жатқанын тағы бір мәрте дәлелдеді. Спорт, шығармашылық және қоғамдық белсенділік арқылы жастар мен тұрғындарды біріктірген бұл бастама – дені сау, қауіпсіз әрі жарқын қоғам құру жолындағы маңызды қадам.
Ақпарат көзі : https://www.gov.kz/memleket/entities/mvd-karaganda/press/news/details/1250513?lang=ru
Жауап қалдыру