Петропавлда QYZYLJAR MUSIC FEST фестивалінің үшінші күні қалай өтті

Петропавлда V Халықаралық QYZYLJAR MUSIC FEST фестивалі жалғасуда. 7 шілде күні қаланың бас алаңы ашық аспан астындағы үлкен би алаңына айналды. Ауқымды мәдени шараның үшінші кеші заманауи жастар мәдениетіне, қарқынды ырғақтарға және жарқын музыкалық сеттерге арналды.

Кештің басты тосынсыйларының бірі Петропавлдан шыққан жас таланттың өнер көрсетуі болды. Ауқымды «Диджейлер баттлына» 13 жастағы диджей бастау берді. Жас болғанына қарамастан, ол пультте өзін сенімді ұстап, өз сетімен көрермендерді ерекше әсерге бөледі және кештің қарқынын бірден көтерді.

Одан кейін пультке тәжірибелі қатысушылар мен дыбыс шеберлері шықты. Олар көрермендерге энергиялық музыкалық сеттер ұсынып, қаланың бас алаңын мерекелік көңіл-күйге, қозғалысқа және шынайы эмоцияға толтырды. Музыка, жарық, би және ашық форматтағы шара жүздеген петропавлдықтар мен қала қонақтарын біріктірді.

Еске сала кетейік, халықаралық музыка мерекесі Петропавлда 5 шілде күні этникалық музыка кешімен басталды. Бұл күні қала тұрғындарының алдында әйгілі «Hassak» фольклорлық-этнографиялық ансамблі өнер көрсетіп, ерекше үнімен және ұлттық нақышымен көрерменді тәнті етті.

6 шілде күні фестиваль заманауи би өнері кешімен жалғасты. Бағдарламаның арнайы қонағы Red Bull Dance Your Style халықаралық жобасының финалисі Руфина Карева болды. Оның өнер көрсетуі фестивальге ерекше серпін беріп, көрермендерге заманауи бидің сұлулығын көрсетті.

Алда петропавлдықтарды тағы бірнеше мазмұнды фестиваль кеші күтіп тұр. 8 шілде күні бағдарлама эстрадалық музыка кешімен жалғасады. Ұйымдастырушылар белгілі орындаушылардың қатысуымен концерттік бағдарлама әзірледі.

9 шілде күні қаланың бас алаңы классикалық музыка үніне бөленеді. Ашық аспан астындағы сахнаға қазақстандық жарқын өнерпаздар Ермек Қасым мен Зарина Алтынбаева, сондай-ақ Италиядан келген арнайы қонақ, опера әншісі Angelo Forte шығады.

QYZYLJAR MUSIC FEST 10 шілде күні ауқымды гала-концертпен аяқталады. Фестивальдің қорытынды кешінде танымал қазақстандық орындаушы Alem өнер көрсетіп, петропавлдықтарға өзінің үздік хиттерін ұсынады.

Фестиваль қала тұрғындары мен қонақтарын музыка, шығармашылық және жарқын мәдени оқиғалар төңірегінде біріктіріп, Петропавлдың жазғы кештерін нағыз өнер мерекесіне айналдыруда.

Ақпарат көзі : https://www.gov.kz/memleket/entities/sko-sayasat/press/news/details/1254713?lang=ru