Мемлекеттік бағдарламалардың орындалуы, әлеуметтік нысандардың құрылысы және экономиканың дамуы Алматы облыстық мәслихатының тұрақты комиссияларының бірлескен отырысының негізгі тақырыптары болды. Депутаттар мектептерді күрделі жөндеу, медициналық мекемелерді салу, индустриялық аймақтарды дамыту, мемлекеттік сәулет-құрылыс бақылауы, туризм және кәсіпкерлікті қолдау мәселелерін қарады.
Білім басқармасының басшысы Қайрат Жұманов 2027 жылға дейін 91 мектепте күрделі жөндеу жүргізілетінін хабарлады. Бірінші кезеңде бағдарламаға 20 нысан енгізіліп, оларға 26,8 млрд теңге бөлінді. Тоғыз мектеп пайдалануға берілді, тағы он бір мектептің жөндеу жұмыстары жалғасуда.
Құрылыс басқармасының басшысы Жасұлан Оналбаев биыл төрт денсаулық сақтау нысаны қаржыландырылып, оның екеуі аяқталғанын атап өтті. Шілде айының соңына дейін Тескенсу ауылындағы дәрігерлік амбулатория мен Нарынқол ауылындағы емхананы тапсыру жоспарлануда. Сондай-ақ тағы 13 медициналық нысанның құрылыс жобалары дайындалды.
Энергетика және сумен жабдықтау басқармасы басшысының міндетін атқарушы Асыл Мұқанәлі «Қайрат» индустриялық аймағының инженерлік инфрақұрылымы құрылысының аяқталғанын және «Қазыбек бек» индустриялық аймағының дамуы жалғасып жатқанын хабарлады.
Мемлекеттік сәулет-құрылыс бақылауы басқармасының басшысы Айдын Әуесбай құрылыс сапасын қамтамасыз ету шаралары туралы айтты. Талғар және Еңбекшіқазақ аудандарында төрт заңсыз нысан бұзылып, үлестік құрылыс саласында бұзушылықтар анықталды.
Туризм басқармасының басшысы Қуанышбек Мирамбекұлы туристік инфрақұрылымды дамыту және қауіпсіздікті арттыру жалғасып жатқанын хабарлады. Бес ай ішінде облыстың ұлттық парктеріне 743 мың адам келді.
«Даму» қоры өңірлік филиалы директорының орынбасары Аслан Слямов депутаттарды шағын және орта бизнесті мемлекеттік қолдау шаралары туралы хабардар етті.
Отырыс қорытындысы бойынша депутаттар қаралған барлық жобалардың іске асырылуы облыстық мәслихаттың тұрақты бақылауында екенін және Алматы облысының одан әрі әлеуметтік-экономикалық дамуы үшін маңызды екенін атап өтті.
Ақпарат көзі : https://www.gov.kz/memleket/entities/almobl-maslihat/press/news/details/1255557?lang=ru
Жауап қалдыру