Қарағанды облысының Өңірлік кәсіпкерлер палатасының алаңында Қарағанды облысы бойынша Мемлекеттік еңбек инспекциясы департаменті басшысының міндетін атқарушы М.И. Әлжанның төрағалығымен жұмыс кездесуі өтті. Кездесудің негізгі тақырыбы кәмелетке толмағандарды еңбек қызметіне тарту кезінде Қазақстан Республикасы Еңбек кодексінің нормаларын қолдану және жұмыс берушілердің еңбек заңнамасы талаптарын сақтауы болды.
Іс-шараға «Атамекен» өңірлік кәсіпкерлер палатасының өкілдері, кәсіподақ ұйымдары және бизнес өкілдері қатысты. Қатысушыларға кәмелетке толмағандардың еңбегін реттейтін еңбек заңнамасының талаптары, оның ішінде еңбек шартын жасасуға жол берілетін жас мөлшері, оны рәсімдеу тәртібі, сондай-ақ 18 жасқа толмаған жұмыскерлерге берілетін кепілдіктер мен белгіленген шектеулер түсіндірілді.
Кездесу барысында балалар еңбегін пайдалануға жол бермеу, кәмелетке толмағандарды жұмысқа тарту кезінде заңнамада белгіленген шектеулерді сақтау және еңбек заңнамасын бұзғаны үшін жұмыс берушілердің жауапкершілігі мәселелеріне ерекше назар аударылды. Кәмелетке толмағандарды ауыр жұмыстарға, еңбек жағдайлары зиянды және қауіпті жұмыстарға, түнгі және үстеме жұмыстарға тартуға заңнамамен тыйым салынатыны атап өтілді.
Жазғы кезеңде мектеп оқушыларының уақытша еңбек қызметіне белсенді тартылуына байланысты жұмыс берушілерге еңбек заңнамасы талаптарының сақталуын қатаң бақылауды қамтамасыз ету, кәмелетке толмаған жұмыскерлермен еңбек шарттарын уақтылы жасасу және қауіпсіз еңбек жағдайларын қамтамасыз ету ұсынылды.
Кездесу қорытындысы бойынша қатысушылар кәмелетке толмағандардың еңбегін ұйымдастыру кезінде еңбек заңнамасы талаптарын сақтау балалардың құқықтарын қорғаудың және еңбек саласындағы құқық бұзушылықтардың алдын алудың маңызды тетігі екенін атап өтті.
Ақпарат көзі : https://www.gov.kz/memleket/entities/karaganda-enbek/press/news/details/1257432?lang=ru
Жауап қалдыру