Әділет министрлігі сот сараптама қызметі саласындағы заңнаманы жетілдіруде

Қазақстан Республикасы Әділет министрлігі сот-сараптама қызметі саласындағы заңнаманы кешенді түрде жетілдіру бойынша жұмыстарын жүргізді.

Заңнамалық өзгерістер аясында:

алғаш рет заңнамалық деңгейде «жеке сот сарапшысы» ұғымы бекітілді және осы қызметті жүзеге асыруға қойылатын талаптар айқындалды;

мемлекеттік және жеке сот сарапшыларының қызметін құқықтық реттеудің бірыңғай тәртібі қамтамасыз етілді;

сот-сараптама қызметін лицензиялау рәсімдері жетілдірілді;

мемлекеттік және жеке сот сарапшыларының кәсіби даярлығына қойылатын бірыңғай талаптар белгіленді;

заңнамада көзделген жағдайларда лицензияның қолданылуын тоқтата тұру мүмкіндігін көздейтін лицензиядан кейінгі бақылау енгізілді;

толық және объективті сараптамалық зерттеу жүргізу үшін қажетті медициналық ақпаратты алу мүмкіндігі қамтамасыз етілді;

«Е-Сараптама» цифрлық жүйесі сот-сараптама қызметін автоматтандырудың бірыңғай цифрлық платформасы ретінде заңнамалық деңгейде бекітілді;

сот-психиатриялық сараптамалардың жекелеген түрлерін жүргізу тәртібі оңтайландырылды;

жеке сот сарапшыларының Сот сарапшылары республикалық палатасының басқару органдарының тәртіптік жауапкершілігінің тетігі регламенттелді;

бюджет қаражаты есебінен жеке сот сарапшылары жүргізетін сот сараптамаларының құнын айқындау мәселелері реттелді.

Қабылданған өзгерістер сот сараптамаларының сапасын арттыруға, мемлекеттік және жеке сот сарапшыларына бірыңғай талаптарды қамтамасыз етуге, цифрландыруды дамытуға, сондай-ақ бақылау және кәсіби жауапкершілік тетіктерін күшейтуге бағытталған.

Бұл өзгерістерді іске асыру құқық қолдану практикасының бірізділігін қамтамасыз етуге, сот-сараптама қызметінің сапасын арттыруға, сот сараптамасы институтына деген сенімді нығайтуға және саланы цифрлық трансформациялауды жалғастыруға мүмкіндік береді.

Заң нормаларын қолдану кезінде олардың Қазақстан Республикасының «Сот-сараптама қызметі туралы» Заңында тікелей көзделген күшіне ену мерзімдерін ескеру қажет екенін атап өту қажет.

Қазақстан Республикасы Әділет министрлігі жаңа заңнамалық нормаларды қолдану мәселелері бойынша мүдделі тұлғалар мен кәсіби қоғамдастыққа түсіндіру жұмыстарын жалғастырады.

Ақпарат көзі : https://www.gov.kz/memleket/entities/adilet/press/news/details/1259870?lang=ru