Бүгін, 19 шілдеде, Зеренді ауданында Ортақ ауылдық округі мен Айдабол ауылы әкімдерін сайлау науқаны өтуде.
Аудандық сайлау комиссиясының төрағасы Алмат Балтағариннің айтуынша, Ортақ ауылдық округінде екі, ал Айдабол ауылында бір учаскелік сайлау комиссиясы жұмыс істейді.
Дауыс беру күніне дейін сайлауды әзірлеу және өткізу жөніндегі күнтізбелік жоспарға сәйкес барлық қажетті дайындық жұмыстары жүргізілді. Сайлаушылардың тізімдері жасақталып, үгіттік баспа материалдарын орналастыру орындары, сондай-ақ кандидаттар мен олардың сенім білдірген тұлғаларының тұрғындармен кездесулер өткізетін алаңдары белгіленді. Кандидаттар заңнамада белгіленген мерзімдерде үгіт-насихат жұмыстарын жүргізді.
Учаскелік сайлау комиссиялары өз жұмысын таңғы сағат 7:00-де бастады. Учаскелер ашылған алғашқы минуттардан-ақ тұрғындар азаматтық борышын орындау үшін дауыс беруге белсенді түрде келе бастады.
Айдабол ауылында алғашқылардың бірі болып Александр Владимирович Даков дауыс берді. №551 учаскелік сайлау комиссиясының төрағасы Богдан Дятлов оны құттықтап, ауыл әкімін сайлау округ тұрғындары үшін маңызды оқиға екенін, өйткені елді мекендердің одан әрі дамуы көп жағдайда тұрғындардың таңдауына байланысты екенін атап өтті.
Дауыс беру тыныш әрі ұйымдасқан жағдайда өтуде. Сайлау учаскелері қажетті құрал-жабдықтармен толық қамтамасыз етілген, ал тұрғындарға жергілікті қоғамдастық ісін басқаруға қатысу жөніндегі конституциялық құқықтарын еркін жүзеге асыруға барлық жағдай жасалған.
Ақпарат көзі : https://www.gov.kz/memleket/entities/aqmola-zerendy/press/news/details/1260118?lang=ru
Жауап қалдыру