ШҚО полицейлері әріптесін құрметті демалысқа шығарып салды
Шығыс Қазақстан облысы Полиция департаментінде жеке құрам жөніндегі бұйрыққа сәйкес полиция подполковнигі Бегембаев Руслан Сейткалиұлын құрметті демалысқа салтанатты түрде шығарып салу рәсімі өтті.
ШҚО Полиция департаментінің бастығы полиция генерал-майоры Ерлан Омарбеков әріптесіне көпжылдық адал қызметі, қызметтік борышын мінсіз атқарғаны және жеке құрамды даярлауға қосқан елеулі үлесі үшін алғыс айтты. Жеке құрам атынан ішкі істер органдарының зейнеткеріне зор денсаулық, амандық, отбасылық бақыт және жаңа өмір кезеңінде сәттілік тіледі.
Өзінің кәсіби жолын ол 2006 жылы Қазақстан Республикасы Қарулы Күштерінің қатарында бастаған. 2008 жылдан бастап ішкі істер органдарында қызмет етіп, кәсіби даярлық бөлімшелерінде әр түрлі лауазымдарды абыроймен атқарды. Құрметті демалысқа Шығыс Қазақстан облысы Полиция департаментінің оқу-жаттығу взводының командирі лауазымынан шықты.
Қызмет жылдарында Бегембаев Руслан білікті басшы, қағидатшыл әрі жауапты қызметкер ретінде танылды. Оның басшылығымен полицейлердің кәсіби, тактикалық және дене шынықтыру даярлығы жетілдіріліп, жинақталған тәжірибе мен білім бірнеше буын қызметкерді тәрбиелеудің берік негізіне айналды.
Полиция департаментінің жеке құрамы Руслан Сейткалиұлына көпжылдық еңбегі, мамандығына адалдығы мен қызметке деген беріктігі үшін шынайы алғысын білдіріп, мықты денсаулық, амандық және ұзақ ғұмыр тіледі.
ШҚО ПД баспасөз қызметі
Ақпарат көзі : https://www.gov.kz/memleket/entities/mvd-vko/press/news/details/1262933?lang=ru
Жауап қалдыру