Қазақстан Республикасы балалардың әл-ауқаты мен құқықтарын қорғау деңгейі бойынша KidsRights 2026 халықаралық индексінде 0,797 балл жинап, 24-орынға тұрақтады. Зерттеуді Роттердамдағы Эразмус университеті халықаралық KidsRights ұйымымен бірлесіп жүргізген. Индекс БҰҰ-ның Бала құқықтары туралы конвенциясын бекіткен 194 мемлекеттегі жағдайды қамтиды.
Мемлекеттерді бағалау бес негізгі бағыт бойынша жүзеге асырылады:
- Өмір сүру мүмкіндігі (аман қалу);
- Денсаулық сақтау;
- Білім беру;
- Балаларды қорғау;
- Қолайлы орта қалыптастыру.
Қазақстан балалардың құқықтарын қамтамасыз ету бойынша жоғары көрсеткіштерге қол жеткізіп, Шығыс Еуропа, Кавказ және Орталық Азия өңіріндегі бірқатар мемлекеттерден алда орнықты.
Анықтама үшін: Рейтинг көшбасшысы болып Нидерланды Корольдігі танылды (0,871 балл). ТҮҰ кеңістігіндегі елдер арасында Молдова — 32, Беларусь — 36, Грузия — 51, Әзербайжан — 60, Армения — 70, Қырғызстан — 82, Тәжікстан — 92, ал Өзбекстан 96-орынға орналасты.
2013 жылдан бері жыл сайын жарияланып келе жатқан KidsRights индексі балалардың құқықтарын қорғау саласындағы мемлекеттік саясаттың тиімділігін бағалайтын басты халықаралық құрал болып табылады. Оның нәтижелері үкіметтер мен халықаралық ұйымдар тарапынан әлеуметтік бағдарламаларды жоспарлауда негізгі бағдар ретінде пайдаланылады.
Ақпарат көзі : https://www.gov.kz/memleket/entities/almaty-bala/press/news/details/1263675?lang=ru
Жауап қалдыру