Жетісу облысындағы Алакөл жағалауында Қазақстан Республикасы Туризм және спорт министрлігі бекіткен 2026 жылға арналған туристік іс-шаралар күнтізбесіне енгізілген «Алакөл толқыны – 2026» фестивалі өтті. Бұл – еліміздегі ірі туристік оқиғалардың бірі әрі оқиғалы туризмді дамытуға бағытталған мемлекеттік саясат аясында ұйымдастырылып отырған жоба.
Фестивальдің ашылу салтанатына Қазақстан Республикасы Туризм және спорт вице-министрі Мирас Төлебаев пен Жетісу облысы әкімінің орынбасары Марлен Қолбаев қатысты. Қонақтар мен қатысушыларды құттықтаған Мирас Төлебаев бүгінде Алакөлдің еліміздегі ең қарқынды дамып келе жатқан туристік бағыттардың біріне айналғанын атап өтті.
«Алакөл – еліміздің негізгі туристік бағыттарының бірі. Осындай фестивальдер өңірдің туристік әлеуетін танытып, жаңа қонақтарды тартуға, шағын және орта бизнестің дамуына серпін беруге және өңір экономикасының нығаюына ықпал етеді», – деді Мирас Төлебаев.
Сондай-ақ вице-министр оқиғалы туризмнің туристерді тартуда, өңірлердің танымалдылығын арттыруда және шағын және орта бизнесті дамытуда маңызды тетік екенін атап өтті.
Фестиваль жоғары деңгейде ұйымдастырылып, оған 5 мыңнан астам адам қатысты. Іс-шараға Қазақстанның әр өңірінен келген демалушылармен қатар Өзбекстан, Қырғызстан, Қытай, Беларусь және Ресейден келген туристер де жиналды.
Қонақтарға интерактивті алаңдар мен театрландырылған қойылымдарды қамтыған мазмұнды мәдени-ойын-сауық бағдарлама ұсынылды. Бас сахнада Әсел Мекебаева, Turar және Ayree өнер көрсетті. Мерекелік кеш көл жағасындағы DJ-party-мен жалғасып, әсем отшашумен аяқталды.
Айта кетейік, «Алакөл толқыны» фестивалі жазғы туристік маусымның маңызды оқиғаларының бірі саналады. Ол Алакөлдің Қазақстандағы жетекші туристік бағыттардың бірі ретіндегі тартымдылығын арттыруға, ішкі және халықаралық туристік нарықтағы танымалдылығын күшейтуге, сондай-ақ елімізде оқиғалы туризмді одан әрі дамытуға өз үлесін қосып келеді.
Ақпарат көзі : https://www.gov.kz/memleket/entities/tsm/press/news/details/1264342?lang=ru
Жауап қалдыру