«Балалар, байқаңыздар!»: Сөйлейтін дрондар тұрғындарға маңызды ережелерді ескертеді

«Балалар, байқаңыздар!»: Сөйлейтін дрондар тұрғындарға маңызды ережелерді ескертеді

«Балалар, байқаңыздар!» — бүгін Шығыс Қазақстан облысының тұрғындарына полицияның арнайы дауыс зорайтқышпен жабдықталған дрондары осылай үн қатып жатыр.

Заманауи ұшқышсыз аппараттар аулалар мен тұрғын аудандарды патрульдеп, қауіпсіздіктің ең маңызды ережелерін еске салуда. Олардың басты міндеті — қайғылы жағдайлардың, әсіресе терезеден құлап кету қаупінің алдын алу.

Жыл сайын көпқабатты үйлердің терезесінен құлап, жасөспірімдер мен сәбилер ауыр жарақат алады. Көп жағдайда бір сәт қана жеткілікті: сәби қараусыз қалып, терезе алдына шығады, москит торға сүйенеді — арты орны толмас өкінішке әкеледі.

Шығыс Қазақстан облысының Полиция департаменті ата-аналарды кішкентайларды қараусыз қалдырмауға, москит торларының беріктігіне сенбеуге және терезелерге арнайы құлыптар орнатуға шақырады.

Жас ұрпақ қауіпсіздігі — ересектердің ортақ жауапкершілігі. Көк аспаннан естілген бұл үндеу әрбір азаматқа сақтық шараларын қатаң сақтау арқылы көздің қарашығындай сақтау керектігін тағы бір мәрте еске салсын.

ШҚО ПД баспасөз қызметі

Ақпарат көзі : https://www.gov.kz/memleket/entities/mvd-vko/press/news/details/1264661?lang=ru