11 маусым күні Теректі ауданының Подстепное ауылында Батыс Қазақстан облысы ветеринария басқармасының ұйымдастыруымен ветеринария саласында сыбайлас жемқорлықтың алдын алу, құқық бұзушылықтардың жолын кесу және қызметтік тәртіпті нығайту мәселелеріне арналған жұмыс кеңесі өтті.
Кеңеске Бәйтерек, Бөрлі, Қаратөбе, Тасқала, Теректі, Сырым және Шыңғырлау аудандық ветеринариялық станцияларының, сондай-ақ Орал қалалық ветеринариялық станциясының директорлары, бухгалтерлері, ауылдық округтердің ветеринариялық пункт меңгерушілері мен басқарманың бөлім басшылары қатысты.
Жиынға БҚО ветеринария басқармасының басшысы А.С. Бралиев төрағалық етті.
Кеңес барысында сыбайлас жемқорлыққа қарсы іс-қимыл мәселелеріне ерекше назар аударылды. Қатысушыларға сыбайлас жемқорлық құқық бұзушылықтары үшін көзделген жауапкершілік шаралары, сыбайлас жемқорлыққа қарсы заңнаманың негізгі талаптары, құқық бұзушылықтардың алдын алу тетіктері және қызметкерлердің сыбайлас жемқорлық фактілеріне тап болған жағдайда атқаруы тиіс іс-қимыл алгоритмдері түсіндірілді.
Сонымен қатар ветеринариялық профилактикалық іс-шаралардың орындалуы, ветеринариялық анықтамаларды беру тәртібі, мал ұрлығының алдын алу шаралары және 2026 жылы салынуы жоспарланған ветеринариялық нысандар құрылысының барысы қаралды.
Кеңесте қызметтік автокөліктерді пайдалану мәселесі де көтеріліп, олардың тек қызметтік міндеттерді орындау мақсатында пайдаланылуы қажеттігі, мемлекеттік мүлікке ұқыпты қарау және белгіленген талаптарды қатаң сақтау жөнінде түсіндіру жұмыстары жүргізілді.
Кеңес ашық пікір алмасу форматында өтіп, қатысушылар өз қызметтеріне қатысты сұрақтарын қойып, ұсыныстарын білдірді. Басқарма мамандары тарапынан тиісті түсіндірмелер беріліп, көтерілген мәселелер бойынша пікір алмасу жүргізілді.
Жиын қорытындысы бойынша айтылған ұсыныстар мен көтерілген мәселелер назарға алынып, оларды шешу және жұмысты жетілдіру бағытында басқарма тарапынан нақты тапсырмалар берілді.
Ақпарат көзі : https://www.gov.kz/memleket/entities/bko-veterinaria/press/news/details/1265307?lang=ru
Жауап қалдыру