Ақтауда патрульдік полиция қызметкерлері батылдық пен кәсіби шеберліктің үлгісін көрсетіп, қайғылы жағдайдың алдын алды. Олар 10-қабаттың сыртқы терезе жақтауына шығып кеткен бүлдіршінді дер кезінде құтқарып, оның өмірін сақтап қалды.
Оқиға бүгін таңғы сағат 09:28-де болды. «102» арнасына қаладағы тұрғын үй кешендерінің бірінде кішкентай баланың ашық терезеден сыртқа шығып, ғимараттың сыртқы жақтауында тұрғаны туралы шұғыл хабарлама келіп түсті. Баланың өміріне төнген қауіп өте жоғары болғандықтан, патрульдік полиция экипажы оқиға орнына санаулы минуттар ішінде жетті.
Полицейлер келген кезде жағдай аса күрделі еді. Бүлдіршін толықтай терезеден шығып, ондаған метр биіктіктегі тар жақтауда тұрған. Кез келген қате қимыл орны толмас қайғыға әкелуі мүмкін болатын.
Осындай сын сағатта полиция қызметкерлері сабыр сақтап, жедел әрі үйлесімді әрекет етті. Олардың батылдығы мен кәсіби шеберлігінің арқасында бала аман-есен құтқарылып, қайғылы оқиғаның алдын алуға мүмкіндік туды.
Бүлдіршіннің өмірін сақтап қалуға Ақтау қаласы Полиция басқармасы патрульдік полиция батальонының қызметкерлері – полиция капитаны Ержан Көкенов пен полиция лейтенанты Данияр Татиев зор үлес қосты. Олар қызметтік борышын адал атқарып қана қоймай, адам өмірін сақтап қалудағы жоғары жауапкершілік пен нағыз ерліктің үлгісін көрсетті.
Осы оқиғадан кейін Маңғыстау облысы Полиция департаменті ата-аналарды балалардың қауіпсіздігіне ерекше көңіл бөлуге шақырды. Әсіресе, терезелері ашық бөлмелерде балаларды қараусыз қалдырмау, терезелерге арнайы қорғаныс құрылғыларын орнату және терезе маңына баланың көтерілуіне мүмкіндік беретін жиһаздарды қоймау қажет екенін ескертті.
Адам өмірін сақтап қалу – үлкен жауапкершілік. Ал қауіпті сәтте қорықпай әрекет етіп, бүлдіршіннің өмірін аман алып қалған ақтаулық полицейлердің ерлігі көпшілікке үлгі болары сөзсіз.
https://www.instagram.com/reel/DbaVRzHMsM-/?utm_source=ig_web_copy_link&igsh=MzRlODBiNWFlZA==
Ақпарат көзі : https://www.gov.kz/memleket/entities/mvd-mangystau/press/news/details/1266099?lang=ru
Жауап қалдыру