Жетісу облысы полиция департаментінде ҚР Ішкі істер министрлігінің «Ұрпақтар сабақтастығы және ұлттық құндылықтар» жобасы аясында «Заң мен Тәртіп – әр отбасының құндылығы» тақырыбында бірыңғай тәрбиелік сағат өтті. Кездесудің негізгі тақырыбы тәлімгерлік институтын дамыту және кәсіби тәжірибені жас қызметкерлерге жеткізу болды.
Іс-шараны ашқан Департамент басшылығы қазіргі заманғы полиция қызметкері заңды жетік білумен қатар, жоғары адамгершілік қасиетке, қоғам алдындағы жауапкершілікке және қызметтік борышына адалдыққа ие болуы керектігін атап өтті. Сондықтан тәлімгерлік жас полицейлердің кәсіби қалыптасуындағы маңызды бағыттардың бірі болып қала береді.
Кездесудің құрметті қонағы Ішкі істер органдарының ардагері, Тәлімгерлер кеңесінің төрағасы Ерлан Сансызбаев болды. Оның көпжылдық қызмет жолы мен бірнеше буын қызметкерлерін тәрбиелеуге қосқан үлесі нағыз тәлімгердің үлгісі ретінде аталып өтті.
Ашық диалог барысында жас қызметкерлер өз тәлімгерлерімен жұмыс тәжірибесімен бөлісіп, қызметтің алғашқы жылдарында көрсетілген қолдау туралы пікірлерін айтты. Ал тәлімгерлер жастарды оқыту мен бағыт-бағдар берудегі тәжірибелерімен бөлісті. Мұндай формат тәлімгерлік жұмысының қазіргі жай-күйін бағалап, өзекті мәселелерді талқылап, алдағы міндеттерді айқындауға мүмкіндік берді.
Кездесу соңында тәлімгерлік – жай ғана міндет емес, ішкі істер органдарының болашағына салынған маңызды инвестиция екені атап өтілді. Бүгін жас қызметкерлерге берілген білім, құндылықтар мен өмірлік ұстанымдар ертеңгі қазақстандық полицияның кәсібилігі мен беделін айқындайды.
Ақпарат көзі : https://www.gov.kz/memleket/entities/mvd-zhetysu/press/news/details/1268645?lang=ru
Жауап қалдыру