Алматы қаласының Өңірлік коммуникациялар қызметі ұйымдастырған баспасөз туры аясында журналистерге Наурызбай ауданындағы маңызды инфрақұрылымдық жобалардың бірі Ақсай өзеніндегі су алу құрылысы мен су дайындау станциясының құрылысы таныстырылды. Жобаның жүзеге асырылу барысы туралы аудан әкімі Нәзира Тоғызбаева мәлімдеді.
Бұл нысан мегаполистің ең қарқынды дамып келе жатқан аудандарының бірі үшін стратегиялық маңызға ие. Пайдалануға берілгеннен кейін ол Наурызбай ауданы тұрғындарын тұрақты әрі сапалы ауыз сумен қамтамасыз етіп, қаланың инженерлік инфрақұрылымының сенімділігін арттыруға мүмкіндік береді.
Қазіргі уақытта нысанның құрылыс дайындығы 98%. Негізгі ғимараттар мен құрылыстардың құрылысы іс жүзінде аяқталған, технологиялық жабдықтар орнатылып, техникалық іске қосу жұмыстары жүргізілді.
«Өздеріңіз білетіндей, Наурызбай ауданындағы ең өзекті мәселенің бірі ауыз су тапшылығы. Аудан қарқынды дамып келеді: жаңа тұрғын үйлер салынып жатыр, инфрақұрылым кеңейіп, халық саны артуда. Соған сәйкес қолданыстағы желілерге түсетін жүктеме де көбейді. Бүгін бізде жақсы жаңалық бар. Ақсай сүзгі станциясының құрылысы аяқталды. Ол Алматы қаласының Наурызбай ауданы мен Алматы облысының Қарасай ауданының 100 мыңнан астам тұрғынын сапалы ауыз сумен қамтамасыз етеді», – деді аудан әкімі.
Нысанды аралау барысында журналистерге су дайындау станциясы көрсетілді. Мұнда радиалды және көлденең тұндырғыштардың, әрқайсысының сыйымдылығы 5 мың текше метр болатын таза су резервуарларының, сондай-ақ су дайындау блогының құрылысы толық аяқталған. Қазіргі уақытта әкімшілік-зертханалық корпустың ішкі әрлеу жұмыстары аяқталуға жақын.
Жобаның желілік инфрақұрылымы да толық дайын. Ұзындығы 5,9 шақырым магистральдық су құбыры салынды, бес автомобиль көпірі мен нысаннан тыс газбен жабдықтау желілерінің құрылысы аяқталды.
Суды тазартуға арналған заманауи жабдықтарға ерекше көңіл бөлінді. «ВодЭкоФильтр» компаниясы шығарған су тазарту кешені нысанға жеткізіліп, оны монтаждау жұмыстары басталды.
Мамандардың айтуынша, «Алматы Су» ШЖҚ МКК-мен бірлесіп жүйенің сынақтары өткізілді. Жобалық су қабылдау құрылғылары арқылы Ақсай өзенінен су алынып, магистральдық су құбырымен жіберілді. Технологиялық резервуарлар мен су дайындау құрылыстары толтырылғаннан кейін бақылау дезинфекциясы жүргізілді.
Зертханалық зерттеулердің нәтижесі судың сапасы барлық қолданыстағы санитариялық және техникалық талапқа толық сәйкес келетінін растады.
Қазіргі уақытта жобаны іске асырудың соңғы кезеңі – іске қосу-баптау жұмыстары басталды. Бұл нысанды ресми түрде пайдалануға беру үшін міндетті кезең болып саналады және барлық инженерлік жүйенің нақты жағдайда жұмысын тексеруге мүмкіндік береді.
Жоба өкілдерінің айтуынша, су алу құрылысы мен су дайындау станциясын толық іске қосу 2026 жылғы тамыз айының соңына жоспарланған.
«Қазіргі уақытта нысанның құрылысы толық аяқталды. Іске қосу-баптау жұмыстары жалғасып жатыр. Соған қарамастан, тұрғындарға су қазірдің өзінде берілуде. Бүгінде станцияның өнімділігі сағатына шамамен 300 текше метр су болады. Көріп тұрғандарыңыздай, барлық ғимарат пен құрылыс толық салынған, жабдықтар орнатылған, қызметтік үй-жайлар жабдықталған, аумақты көріктендіру жұмыстары аяқталған. Алдағы бірнеше күн ішінде іске қосу-баптау және жабдықтарды соңғы рет реттеу жұмыстары толық аяқталып, станция штаттық режимде жұмыс істей бастайды», – деді жоба құрылысының жетекшісі Гайраджан Турдиев.
Наурызбай ауданының әкімі Нәзира Тоғызбаеваның айтуынша, нысанды пайдалануға беру ауданның инженерлік инфрақұрылымын дамытудағы маңызды кезең болады әрі халық саны қарқынды өсіп келе жатқан аудан тұрғындарын ұзақ жылдар бойы сапалы ауыз сумен қамтамасыз етуге мүмкіндік береді. Жаңа кешен сумен жабдықтау жүйесінің сенімділігін едәуір арттырып, Наурызбай ауданының одан әрі дамуына қажетті қосымша қуат қорын қалыптастырады.
Ақпарат көзі : https://www.gov.kz/memleket/entities/almaty/press/news/details/1269367?lang=ru
Жауап қалдыру