Жыл басынан бері Қарағанды облысында 150 дүкен мен өзге де сауда нысанына тексеру жүргізілді. Мамандар сауда орындарында заң талаптарының сақталуын, сондай-ақ тұтынушылардың құқықтарының бұзылмауын тұрақты бақылауда ұстап отыр.
Тексеру барысында әлеуметтік маңызы бар азық-түлік тауарларының бағасына ерекше мән беріледі. Қолданыстағы заңнамаға сәйкес, мұндай тауарларға белгіленетін сауда үстемесі 15 пайыздан аспауы қажет. Бұдан бөлек, инспекторлар баға көрсеткіштерінің болуын, олардың дұрыс рәсімделуін және барлық өнімдердің бағасы ұлттық валюта — теңгемен көрсетілуін тексереді.
Тексеру жұмыстарының ең көп бөлігі Қарағанды қаласында жүргізілді — мұнда 120 сауда нысаны қамтылды. Приозерск қаласында 10 нысан, Балқаш пен Шахтинск қалаларында 5 нысаннан, Теміртау қаласында 4 нысан тексерілді. Осакаров және Бұқар жырау аудандарында екі дүкеннен, ал Абай ауданында бір сауда орны бақылаудан өтті.
Өткен жылдың осы кезеңімен салыстырғанда тексерулер саны 46 пайызға артқан. Атап айтқанда, 2025 жылдың басында 103 сауда нысаны тексерілсе, биыл бұл көрсеткіш 150-ге жетіп отыр.
Тексеру нәтижесінде заң талаптарын бұзған кәсіпкерлерге жалпы сомасы 3 миллион теңгеден асатын әкімшілік айыппұлдар салынды.
Сауда саласындағы заң талаптарының сақталуын қамтамасыз ету және тұтынушылардың құқықтарын қорғау бағытындағы жұмыстар тұрақты түрде жалғасуда.
Ақпарат көзі : https://www.gov.kz/memleket/entities/karaganda/press/news/details/1268828?lang=ru
Жауап қалдыру