Аудандық мәслихаттың тұрақты комиссияларының бірлескен отырысына дайындық жұмыстары жалғасуда. Осыған орай аудандық мәслихаттың төрағасы А.С. Асанова № 2 сайлау округінің депутаты С.С. Мустафинмен бірге Дмитриев, Интернационал, Құртай және Ақжан ауылдық округтеріне жұмыс сапарымен барды.
Жұмыс сапары барысында депутаттар ауылдық округ әкімдерімен және білім беру ұйымдарының өкілдерімен кездесті. Кездесулер барысында мектептердің жаңа оқу жылына дайындығы, әлеуметтік сала нысандарының алдағы жылыту маусымына әзірлігі, сондай-ақ шұғыл шешімді қажет ететін өзекті мәселелер талқыланды.
Жұмыс сапарының маңызды бағыттарының бірі Жарқын ауылы болды. Депутаттар ауылдағы мектепке барып, білім ордасының жаңа оқу жылына дайындығымен танысты. Әсіресе мектеп ауласының абаттандырылуы ерекше назар аудартты. Мектеп директоры Ә.Қ. Қажыбаевтың басшылығымен педагогикалық ұжымның тынымсыз еңбегінің арқасында мектеп ауласы жайқалған гүлзарлармен көркейіп, оқушылар үшін жайлы әрі көркем орта қалыптасқан.
Сонымен қатар мектепте оқушылар санының аздығы мәселесі әлі де өзекті болып отыр. Дмитриев ауылдық округінің әкімі Д.Қ. Исенкеневтің айтуынша, округке жаңа тұрғындарды тарту бағытында жүйелі жұмыстар жүргізілуде. Қоныс аудару бағдарламасы аясында Маңғыстау облысынан бір отбасы келіп қоныстанды, жуық арада тағы екі отбасының келуі күтілуде. Сонымен бірге қоныс аударушыларды тұрғын үймен қамтамасыз ету мәселесі де шешімін табуда.
Мектеп жылыту маусымына толық дайын: қажетті көмір қоры жеткізіліп, қазандықтағы жабдықтар қалыпты жұмыс жағдайында. Алдағы уақытта жылумен қамту жүйесінің тұрақтылығын арттыру мақсатында қосымша қазандық орнату жоспарланып отыр.
Депутаттар сондай-ақ Жарқын ауылындағы медициналық пунктте болып, онда жүргізіліп жатқан жөндеу жұмыстарының барысымен танысты. Бұдан бөлек, жергілікті тауар өндірушілердің қолдауының арқасында ауылдық округ әкімдігі су мұнарасын жөндеу мәселесін шешті. Дегенмен нысанды алдағы уақытта тұрақты пайдалануды қамтамасыз ету үшін қосымша бюджет қаражаты қажет. Бұл шығындарды келесі қаржы жылына арналған бюджетті қалыптастыру кезінде қарастыру жоспарлануда.
Дмитриевка ауылында депутаттар шағын орталықта болып, мекеменің материалдық-техникалық жағдайымен танысты. Қазіргі таңда мұнда линолеум мен кілем жабындысын ауыстыру, сондай-ақ спорттық құрал-жабдықтарды жаңарту қажет. Сонымен қатар мекеменің алдағы жылыту маусымына дайындығы мәселелері де талқыланды. Көмір жеткізу бекітілген кестеге сәйкес жүзеге асырылатын болады. Алайда округ әкімі жуырда жөндеуден өткен жолдардың сақталуына алаңдаушылық білдіріп, жаңа асфальт жабынының бүлінуіне жол бермеу мақсатында қатты отынды ауыр жүк көліктерімен емес, КАМАЗ автокөліктерімен тасымалдауды тиімді деп санайтынын жеткізді.
Медициналық пунктке бару барысында да шешімін қажет ететін бірқатар мәселелер көтерілді. Ғимараттың кіреберіс есігін ауыстыру, жарықтандыру шамдарының плафондарын жаңарту және еденге жөндеу жұмыстарын жүргізу қажет. Сонымен қатар депутаттар ауылды абаттандыру жұмыстарын одан әрі жалғастырудың маңыздылығына назар аударды.
Жұмыс сапарының келесі бағыты Құртай ауылдық округі болды. Мұнда елді мекенді абаттандыру жұмыстарына айрықша мән беріліп, тазалық пен тәртіпті сақтау шаралары тұрақты түрде жүзеге асырылып келеді. Мектеп жаңа оқу жылына толық дайын, ал қажетті көмір қоры белгіленген мерзімде жеткізілетін болады. Сонымен қатар Степное ауылында демеушілердің қолдауымен медициналық пунктке жөндеу жұмыстары жүргізілуде. Қазіргі уақытта терезелері ауыстырылып, ғимараттың айналасына қоршау орнатылуда.
Интернационал ауылдық округінде депутаттар әлеуметтік нысандардың және олардың аумақтарының тиісті деңгейде күтіп ұсталғанын атап өтті. Мектеп жаңа оқу жылы мен жылыту маусымына дер кезінде дайындалған. Сонымен қатар округ әкімі Т.И. Павлова Дружба ауылына апаратын автомобиль жолының сақталуы мәселесін көтерді. Егін жинау науқаны кезінде жолға түсетін жүктеменің артуына байланысты ауыр жүк көліктерінің қозғалысы жол жабынының бүлінуіне жол бермеу үшін тиісті шаралар қабылдау қажеттігі айтылды.
Жұмыс сапары Ақжан ауылдық округінде қорытындыланды. Бүгінде мұнда шешімін күткен мәселелер аз емес. Мектеп ғимаратындағы қазандықтың шатыры мен мектептің кіреберісіне жөндеу жұмыстарын жүргізу қажет. Сондай-ақ ауылда медицина қызметкерінің болмауы тұрғындардың медициналық көмекке қолжетімділігіне тікелей әсер етуде. Бұдан бөлек, елді мекенді абаттандыру жұмыстарын жандандыру қажет. Жақын арада ауылдық қоқыс тастайтын үйіндісінде қалдықтарды үйіп-тегістеу жұмыстары жүргізілмек.
Сонымен қатар барлық араланған ауылдық округтерде облысты дамыту жоспары аясындағы жобаларды іске асыру жалғасуда. Солардың бірі – ветеринариялық пункттердің құрылысы. Құрылыс жұмыстары аяқталғаннан кейін жаңа нысандар ветеринариялық қызмет көрсету сапасын арттырып, жеке қосалқы шаруашылық иелері мен ауыл шаруашылығы тауарын өндірушілер үшін қолайлы жағдай жасауға мүмкіндік береді.
Жұмыс сапарының қорытындысын шығара отырып, депутаттар ауылдық округ әкімдері көтерген мәселелердің басым бөлігі өкілді және атқарушы органдардың бірлескен жұмысы арқылы ғана шешімін табатынын атап өтті. Барлық ұсыныстар мен ескертулер аудандық мәслихаттың тұрақты комиссияларының бірлескен отырысында қаралатын мәселелер тізбесіне енгізіліп, оларды іске асырудың алдағы нақты шаралары айқындалатын болады.
Ақпарат көзі : https://www.gov.kz/memleket/entities/timiryazmaslihat-sko/press/news/details/1269747?lang=ru
Жауап қалдыру