Астанада 1 тамыздан бастап дәстүрлі республикалық «Мектепке жол» қайырымдылық акциясы өтіп жатыр. Акцияның мақсаты — жаңа оқу жылына дайындық барысында әлеуметтік осал санаттағы отбасылардан шыққан балаларға қолдау көрсету және олардың мектепке толық дайын болуына жағдай жасау, деп хабарлайды елорда әкімдігінің ресми сайты.
Биыл «Мектепке жол» акциясы аясында 8 500-ден астам оқушыны қамту жоспарланып отыр. Демеушілердің қаражаты есебінен аз қамтылған және көпбалалы отбасылардың балаларына, жетім балаларға және ата-анасының қамқорлығынсыз қалған балаларға қайырымдылық көмек көрсетіледі. Оларға мектеп рюкзактары мен оқу құралдары табысталады.
Қазіргі уақытта білім беру ұйымдары акцияны өткізіп, сонымен қатар көмекке мұқтаж оқушылардың тізімдерін нақтылап жатыр.
Сонымен қатар жаңа оқу жылы қарсаңында әлеуметтік қолдау Жалпыға бірдей міндетті оқу қоры арқылы да көрсетіледі.
Материалдық көмек Қазақстан Республикасы Үкіметінің 2008 жылғы 25 қаңтардағы №64 қаулысына сәйкес әлеуметтік осал бес санатқа жататын балаларға беріледі. Ата-аналар немесе заңды өкілдер мектеп формасын, аяқ киімді және кеңсе тауарларын өз бетінше таңдап, сатып алуы үшін қаражат олардың есепшоттарына аударылады.
Бүгінде елордалық мектептерге материалдық көмек алуға 5 мыңнан астам өтініш келіп түсті. Өтініштерді қабылдау және қарау жұмыстары жалғасып жатыр.
Сондай-ақ 2-31 тамыз аралығында Астананың барлық ауданында мектеп жәрмеңкелері ұйымдастырылады. Онда тұрғындарға қолжетімді бағамен мектеп формасы, аяқ киім, кеңсе тауарлары және оқу жылына қажетті өзге де өнімдер ұсынылады.
Бұдан бөлек, қалада «Мейірімді қолдар» қайырымдылық акциясы өтеді. Оның аясында аудан әкімдіктері мектеп құралдары мен оқу жабдықтарын жинауға арналған арнайы контейнерлер орнату жұмыстарын ұйымдастырады.
«Мектепке жол» акциясы — әрбір баланың сапалы білім алуына тең мүмкіндік жасауға бағытталған игі бастама.
Ақпарат көзі : https://www.gov.kz/memleket/entities/astana/press/news/details/1269838?lang=ru
Жауап қалдыру