Қарағандыда полициядан қашуға әрекеттенген жүргізуші күтпеген жерден өз қателігінің құрбаны болды. Оқиға орнында ұмыт қалдырған ұялы телефоны тәртіп сақшыларына оның жеке басын санаулы уақыт ішінде анықтауға мүмкіндік берді. Түнгі уақытта Қарағанды қаласы Патрульдік полиция полкінің қызметкерлері кезекті патрульдеу барысында күдік тудырған автокөлікті байқайды. Полицейлердің тоқтау туралы заңды талабына бағынудың орнына жүргізуші газды үдетіп, қашып кетуге әрекет жасаған. Қуғын-сүргін ұзаққа созылған жоқ. Қаланың аулаларының бірінде жүргізуші маневр жасау кезінде көлікті биік жиектастан асыра алмай, автокөлік тұрып қалады. Осыны пайдаланған күдікті көлікті тастап, жаяу ізін суытады. Алайда асығыс сәтте салонда ұялы телефонын қалдырып кеткен. Оқиға туралы ақпарат бірден Ә. Бөкейхан атындағы полиция бөліміне жеткізілді. Мемлекеттік тіркеу нөмірі арқылы көлік иесі анықталды. Полицейлер оның мекенжайына барғанымен, 28 жастағы қала тұрғыны көлігінің белгісіз біреудің қолына түскенін білмеген болып шықты. Ол мән-жайды анықтау үшін оқиға орнына жеткізілді. Тергеу барысында көлікте қалған ұялы телефон негізгі айғаққа айналды. Телефон нөмірі арқылы тәртіп сақшылары күдіктінің жеке басын анықтап, 20 жастағы қарағандылықты қолға түсірді. Оның айтуынша, көлікті тек үйіне жету үшін айдап кеткен. Алайда жолда полиция экипажын көрген соң қашуға бел буған. Аталған дерек бойынша сотқа дейінгі тергеп-тексеру басталды. Қазіргі уақытта оқиғаның барлық мән-жайын анықтауға бағытталған қажетті тергеу әрекеттері жүргізілуде.
Ақпарат көзі : https://www.gov.kz/memleket/entities/mvd-karaganda/press/news/details/1269219?lang=ru
Жауап қалдыру