«Caspian Sea Action Week 2026» апталығы аясында Ақтау қаласында «Бір Каспий – бір болашақ» атты фасилитациялық сессия және «Бірлескен ғылыми зерттеулер – Каспий теңізінің өзекті мәселелерін шешудің кілті» атты халықаралық дөңгелек үстел өтті.
Іс-шараға аралас форматта Каспий маңы мемлекеттерінің табиғатты қорғау ведомстволарының, ғылыми-зерттеу ұйымдарының және сарапшылар қауымдастығының өкілдері, сондай-ақ Тегеран конвенциясының Уақытша хатшылығының үйлестірушісі Махир Алиев және БҰҰ-ның жобаларға қызмет көрсету басқармасының өкілі Томас Прайс қатысты.
Құттықтау сөзінде Қазақстан Республикасы Экология және табиғи ресурстар вице-министрі Мансур Турсынович Ошурбаев Каспий маңы мемлекеттері арасындағы ғылыми ынтымақтастықты нығайтудың маңыздылығын атап өтті. Оның айтуынша, ғылыми деректермен алмасу, бірлескен зерттеулер жүргізу, ғылыми инфрақұрылымды дамыту және мониторингтің заманауи технологияларын енгізу Каспий өңірінде бірыңғай ғылыми кеңістік қалыптастырудың маңызды шарттары болып табылады.
«Бүгінде ғылымның рөлі артып келеді. Заманауи зерттеулер Каспий теңізінде болып жатқан үдерістерді тереңірек түсінуге, экологиялық мониторинг жүйелерін жетілдіруге, алдағы өзгерістерді болжауға және тиімді басқарушылық шешімдер қабылдау үшін ғылыми негізделген ұсынымдар әзірлеуге мүмкіндік береді», – деп атап өтті вице-министр М. Ошурбаев.
Сондай-ақ Каспий маңы мемлекеттерінен құттықтау сөз сөйлегендер қатарында Ресей Федерациясы Табиғи ресурстар және экология министрінің орынбасары Тетенькин Д.Д., Әзербайжан Республикасының Ұлттық гидрометеорологиялық қызметі басшысының орынбасары Акбар Аскеров, Иран Ислам Республикасы Қоршаған ортаны қорғау ұйымының Теңіз ортасы және сулы-батпақты алқаптар бөлімінің директор орынбасары Ахмадреза Лахиджанзаде және Түрікменстанның Хазар мемлекеттік табиғи қорығы (ХГПЗ) ғылыми бөлімінің басшысы Маммедов Сахетмурат болды.
Іс-шара барысында қатысушылар Каспий теңізінің гидрометеорологиялық және экологиялық зерттеулерін, теңіз деңгейінің өзгеру мәселелерін, экологиялық мониторингті, теңіз және жағалау экожүйелерінің жай-күйін, биологиялық әртүрлілікті сақтау және климаттық факторлардың әсерін талқылады. Жеке сессия гидробиологиялық зерттеулерге, соның ішінде экожүйелерді сақтау және теңіз деңгейінің өзгеруінің Каспий теңізінің биологиялық әртүрлілігіне әсеріне арналды.
Іс-шара барысында Каспий маңы мемлекеттері арасында бірлескен ғылыми зерттеулерді дамыту және деректер алмасу мәселелеріне ерекше назар аударылды.
Талқылау қорытындысы бойынша қатысушылар ғылыми өзара іс-қимылды одан әрі нығайтудың және зерттеу нәтижелерін Каспий теңізінің экожүйесін сақтауға бағытталған ұзақ мерзімді шешімдерді әзірлеуде пайдаланудың маңыздылығын атап өтті.
Ақпарат көзі : https://www.gov.kz/memleket/entities/ecogeo/press/news/details/1270809?lang=ru
Жауап қалдыру