Ұлттық ұланның Қарағанды қаласындағы 6505 әскери бөлімінде қызмет ететін қатардағы жауынгер Артём Кудряшов әскерге келгенге дейін қазақ тілінде сөйлей алмайтын. Алайда сегіз айдың ішінде мемлекеттік тілді меңгеріп, қызығушылығы артқаны соншалық, бос уақытын қазақ әдебиетін оқуға арнайтын болды. Соның нәтижесінде ол Абай Құнанбайұлының өлеңдерін жатқа айтып, қара сөздерін тұрақты оқуды әдетке айналдырған.
Хәкімнің мұрасы сарбаз үшін тіл үйренудің құралы ғана емес, қазақ халқының дүниетанымы мен рухани болмысын танудың жаңа әлемі іспетті. Әр шығармадан тағылым алып, әрбір қара сөзден өмірлік ой түйген жауынгердің мемлекеттік тілге деген ықыласы күн өткен сайын артып келеді. Қазір оның ең жиі парақтайтын кітаптарының бірі – Абай жинағы. Оған ақынның «Қыс» атты өлеңі айрықша ұнайды.
Ұлы ойшылдың еңбектері ұлтқа ғана емес, қазақ елін танып-білгісі келетін кез келген жанға рухани бағдар бола алатынын Артёмнің өмірінен де байқауға болады. Ол үшін Абай – тіл мен мәдениетті жақындастырған рухани ұстаз.
Бүгінде қатардағы жауынгер Артём Кудряшов әскери міндетін де жоғары жауапкершілікпен атқарып жүр. Қарауыл қызметін атқаратын жауынгер сеніп тапсырылған нысандардың қауіпсіздігін қамтамасыз етіп, жауынгерлік міндетін абыроймен орындауда.
#АБАЙКҮНІ
ҚР ІІМ Ұлттық ұланының баспасөз қызметі
Ақпарат көзі : https://www.gov.kz/memleket/entities/kvv/press/news/details/1271141?lang=ru
Жауап қалдыру