Қазақстан Республикасы Еңбек және халықты әлеуметтік қорғау министрлігінің Алматы қаласы бойынша Әлеуметтік қорғау саласындағы реттеу және бақылау комитетінің департаменті басшысы М.Т. Мұратбеков Алматы қаласының Өңірлік коммуникациялар қызметінің алаңында «Мемлекеттің азаматтарды әлеуметтік қамсыздандыру бойынша қабылдап жатқан шаралары» тақырыбында брифинг өткізді.
Брифинг барысында Қазақстан Республикасы Еңбек және халықты әлеуметтік қорғау министрлігі жүзеге асырып отырған халықты әлеуметтік қорғау саласындағы мемлекеттік саясаттың негізгі бағыттары, сондай-ақ Департаменттің Алматы қаласы тұрғындарын зейнетақы және әлеуметтік төлемдермен қамтамасыз ету бағытындағы жұмысының нәтижелері таныстырылды.
Мемлекеттік көрсетілетін қызметтердің қолжетімділігін арттыруға, әлеуметтік саланы цифрлық трансформациялауға және азаматтарды әлеуметтік қолдау тетіктерін одан әрі жетілдіруге ерекше назар аударылды.
Айтылғандай, бүгінде мемлекеттік әлеуметтік қорғау жүйесі адамды өмірінің барлық кезеңінде дерлік – бала дүниеге келген сәттен бастап зейнеткерлік жасқа жеткенге дейін сүйемелдейді.
Алматы қаласында шамамен 692 мың тұрғын мемлекеттік әлеуметтік қолдау шараларымен қамтылған, ал әлеуметтік төлемдерді қаржыландырудың ай сайынғы көлемі 56 млрд теңгеден асады.
Департамент басшысы атап өткендей, жыл басынан бері бала тууына және оның күтіміне байланысты 16 мыңнан астам жәрдемақы, 9,5 мың мемлекеттік базалық зейнетақы төлемі, 8,6 мың жасына байланысты зейнетақы төлемі, 2 мыңға жуық мүгедектік бойынша жәрдемақы, сондай-ақ заңнамада көзделген өзге де мыңдаған әлеуметтік төлем тағайындалды.
Бұл көрсеткіштер қала тұрғындары арасында мемлекеттік әлеуметтік қолдау шараларына сұраныстың жоғары екенін көрсетеді.
Брифингтің жеке бөлігі мемлекеттік көрсетілетін қызметтерді цифрландыру мәселелеріне арналды. Заманауи ақпараттық жүйелерді енгізу және төлемдерді проактивті түрде тағайындау тетіктерін пайдалану нәтижесінде азаматтар мемлекеттік органдарға жеке бармай-ақ әлеуметтік қызметтерді жиі алып келеді.
Тек ағымдағы жылдың бірінші жартыжылдығында зейнетақы және әлеуметтік қамсыздандыру саласындағы мемлекеттік қызметтердің шамамен 40%-ы проактивті форматта көрсетілді.
Сондай-ақ брифингке қатысушыларға әлеуметтік төлемдерді тағайындау заңдылығын қамтамасыз ету бойынша қабылданып жатқан шаралар туралы ақпарат берілді.
Заманауи цифрлық технологиялар мемлекеттік қаражатты заңсыз алу жағдайларын анықтауға, әлеуметтік алаяқтықтың алдын алуға және мемлекеттік қолдаудың атаулылығын қамтамасыз етуге мүмкіндік береді.
Департамент жүргізген жұмыстардың нәтижесінде негізсіз төленген 70 млн теңгеден астам қаражат мемлекеттік бюджетке қайтарылды. Бұл бағыттағы жұмыс жүйелі түрде әрі қарай да жалғасын табады.
Кездесуді қорытындылай келе, әлеуметтік қорғау жүйесін одан әрі дамыту цифрлық сервистерді кеңейтуге, мемлекеттік көрсетілетін қызметтердің сапасын арттыруға, төлемдерді тағайындаудың проактивті форматын дамытуға және мемлекеттік қолдау шараларының әрбір азамат үшін барынша қолжетімділігін қамтамасыз етуге бағытталатыны атап өтілді.
Ақпарат көзі : https://www.gov.kz/memleket/entities/enbek-almaty/press/news/details/1272534?lang=kk
Жауап қалдыру