Жамбыл облысы, Жуалы ауданы. 2026 жыл – Цифрландыру және жасанды интеллект жылы. Осыған орай мемлекеттік қызмет көрсету мен бақылау жұмыстарын заманауи технологиялар арқылы жетілдіруге ерекше мән берілуде.
Пробация саласындағы осындай жаңашылдықтардың бірі – «Цифрлық пробация» қосымшасының Жуалы аудандық пробация қызметінің жұмысына енгізілуі.
Цифрлық жүйе пробация есебінде тұрған азаматтарды бақылау үдерісін жеңілдетіп, ақпаратты жедел алуға және белгіленген талаптардың сақталуын тиімді қадағалауға мүмкіндік береді.
Бір батырманың ар жағында – нақты жауапкершілік
«Цифрлық пробация» қосымшасының басты мақсаты – бақылауды күшейту ғана емес, сотталғандардың қайта құқық бұзушылық жасауына жол бермеу және профилактикалық жұмыстардың тиімділігін арттыру.
Мәселен, Жуалы ауданында пробация есебінде тұрған азаматтардың бірі қызмет мамандарына ескертпестен белгіленген аумақтан шығып, Қаратау қаласына барған. Бұл жағдай цифрлық бақылау жүйесі арқылы анықталып, азаматқа қолданыстағы заңнамаға сәйкес тиісті ескерту жасалды.
Бұл – цифрлық технологияның құқық бұзушылық фактілерін дер кезінде анықтап, уақтылы шара қабылдауға мүмкіндік беретінін көрсетеді.
Бақылау ғана емес – алдын алу
Пробация қызметінің негізгі міндеттерінің бірі – құқық бұзушылықтың алдын алу және есепте тұрған азаматтардың қоғамға қайта бейімделуіне ықпал ету.
Осы бағытта Жуалы аудандық пробация қызметінің мамандары есепте тұрған азаматтармен тұрақты түрде профилактикалық және түсіндіру жұмыстарын жүргізуде. Оларға белгіленген талаптарды сақтау, пробация қызметімен тұрақты байланыста болу және рұқсатсыз белгіленген аумақтан шықпау жөнінде түсіндірме беріледі.
Бүгінде пробация есебінде тұрған азаматтардың 100 пайызына «Цифрлық пробация» қосымшасы орнатылған. Бұл бақылау жұмыстарын толық қамтып, әрбір есептегі азаматпен жұмысты жүйелі түрде ұйымдастыруға мүмкіндік беріп отыр.
Цифрландыру – жауапкершіліктің жаңа тетігі
Цифрландыруды тек электрондық жүйе немесе технология ретінде қабылдауға болмайды. Пробация саласында оның негізгі мақсаты – азаматтардың заң талаптарын сақтауына ықпал ету, құқық бұзушылықтың алдын алу және олардың қоғамға қайта бейімделуіне жағдай жасау.
Заманауи технология мен пробация қызметкерлерінің кәсіби жұмысы қатар жүрген жағдайда бақылау жұмыстарының тиімділігі артып, профилактикалық шараларды уақтылы жүргізуге мүмкіндік молаяды.
Жуалы аудандық пробация қызметінің тәжірибесі – цифрлық технологиялардың пробация саласындағы жұмысты жаңа деңгейге көтеруге мүмкіндік беретінінің нақты мысалы.
Цифрлық пробация – бақылаудың ғана емес, алдын алу мен жауапкершілікті арттырудың жаңа форматы.
Ақпарат көзі : https://www.gov.kz/memleket/entities/duiszhambyl/press/news/details/1272797?lang=ru
Жауап қалдыру