«Нұрлы жол» теміржол вокзалында «Астана – есірткісіз қала!» тақырыптық жолаушылар пойызының салтанатты іске қосылуы өтті. Пойыз күн сайын Астана – Бурабай бағыты бойынша қатынайтын болады.
Іс-шара Көліктегі полиция департаментінің Астана қаласы полиция департаментімен бірлесіп, елорда әкімдігінің және қоғамдық ұйымдардың қолдауымен жүзеге асырылды.
Жоба «Заң және тәртіп» тұжырымдамасы аясында іске асырылып, есірткі қылмыстары мен құқық бұзушылықтарының алдын алуға, қоғамда есірткіге деген тұрақты теріс көзқарасты қалыптастыруға және салауатты өмір салтын насихаттауға бағытталған.
Жобаның басты ерекшелігі – есірткіге қарсы және профилактикалық бағытта арнайы безендірілген вагондар. Пойыздың күн сайын қатынауы оны жолаушылардың кең ауқымын қамтитын мобильді ақпараттық алаңға айналдырады.
Салтанатты іске қосу барысында жобаның таныстырылымы, концерттік бағдарлама, көркемөнер туындыларының көрмесі, интерактивті профилактикалық алаңдар ұйымдастырылды. Сондай-ақ Көліктегі ПД Кинологиялық қызмет орталығының қызметтік иттерінің көрсетілімдері өткізіліп, заманауи техникалық құралдар, оның ішінде роботтандырылған ит таныстырылды.
Жобаға мемлекеттік органдардың өкілдері, қоғамдық бірлестіктер, волонтерлер мен жастар белсенділері тартылды.
«Астана – есірткісіз қала!» – қауіпсіз ортаны қалыптастыру және есірткісіз болашақты қамтамасыз ету жолында құқық қорғау органдары мен қоғамның күш-жігерін біріктіруге бағытталған маңызды профилактикалық жоба.
Ақпарат көзі : https://www.gov.kz/memleket/entities/mvd-transport/press/news/details/1273852?lang=ru
Жауап қалдыру