Қазақстанда арнаулы әлеуметтік қызметтер көрсететін ұйымдарға қойылатын сапа мен қауіпсіздіктің бірыңғай талаптары белгіленген. Олар көрсетілетін қызметті ұсынатындардың барлығына, олардың орналасқан өңіріне, меншік нысанына және қызмет алушылар санатына қарамастан қолданылады.
Қазіргі таңда арнаулы әлеуметтік қызметтерді 600-ден астам лицензияланған ұйым 100 мыңнан аса азаматқа көрсетеді. Бірыңғай тәсілдің негізгі мақсаты – адамның тұрғылықты жеріне немесе жүгінген ұйымына қарамастан, көрсетілетін көмектің сапасын бірдей базалық деңгейде қамтамасыз ету.
Мемлекеттік стандарттарда тұру жағдайларына, қауіпсіздікке, кадрлық қамтылуына, материалдық-техникалық базасына, сондай-ақ көрсетілетін қызметтердің көлемі мен сапасына қойылатын талаптар айқындалған.
Яғни талаптар ғимараттар мен құрал-жабдықтардың болуымен ғана шектелмейді. Негізгі назар көрсетілетін көмектің сапасына, мамандардың кәсібилігіне және қызмет алушының қауіпсіздігіне аударылады.
Жүйені дамытудың маңызды кезеңдерінің бірі – 2025 жылғы 1 қаңтардан бастап арнаулы әлеуметтік қызметтер көрсететін ұйымдарды міндетті лицензиялау тәртібінің енгізілуі. Енді белгіленген талаптарға сәйкестік лицензия алу кезінде ғана емес, мемлекеттік бақылау барысында да бағаланады.
Бірыңғай талаптар мемлекеттік те, мемлекеттік емес те қызмет көрсетушілерге бірдей қолданылады. Бұл жүйеге қатысушылар үшін тең жағдай қалыптастырып, азаматтардың көрсетілетін әлеуметтік көмектің сапасына деген сенімін арттырады.
Сонымен қатар арнаулы әлеуметтік қызметтер жүйесін жетілдіру жұмыстары жалғасуда. Цифрлық шешімдер енгізіліп, қаржыландыру мен мамандар даярлау тәсілдері жетілдірілуде, заманауи инфрақұрылым дамытылуда.
Негізгі қағидат өзгеріссіз қалады: тұрғылықты жері немесе ұйымның меншік нысаны әлеуметтік көмектің сапасына әсер етпеуі тиіс. Арнаулы әлеуметтік қызмет алушылардың барлығы қауіпсіз, кәсіби әрі сапалы қолдауға тең дәрежеде қол жеткізуі қажет.
Ақпарат көзі : https://www.gov.kz/memleket/entities/enbek/press/news/details/1274007?lang=ru
Жауап қалдыру