Иісшіл серіктер: қызметтік иттер бір аптада екі баланы және жоғалған жылқы үйірін тапты. Қарағанды облысының полицейлері қызметтік иттердің көмегімен қысқа уақыт ішінде жоғалған екі баланы тауып, 12 бас жылқыны иесіне қайтарды. Қызметтік иттер – полицияның ең сенімді әрі төрт аяқты серіктерінің бірі. Олардың ерекше иіс сезу қабілеті, төзімділігі және ізге түсу шеберлігі күрделі жағдайларда аса маңызды. Мұны өткен аптадағы бірнеше оқиға тағы бір мәрте дәлелдеді. Бір күннің ішінде кинологтармен бірге жұмыс істеген қызметтік иттер қаланың әр бөлігінде жоғалып кеткен екі баланы тауып, ата-аналарына аман-есен қайтарды. Жексенбі күні Қарағандыда 7 жастағы баланың жоғалғаны туралы хабарлама түсті. Бала үй ауласынан шығып кеткен, ал өзін және қайда екенін түсіндіріп айту мүмкіндігі болмаған. Сол күні қаладағы адам көп жиналатын базарлардың бірінде 5 жастағы бала ата-анасының назарынан тыс қалып, жоғалып кеткен. Ата-аналардың өз бетінше жүргізген іздестіру жұмыстары нәтиже бермеген соң, олар полицияға жүгінген. Кинологтар қызметтік иттерімен оқиға орнына жедел жетіп, іздестіру жұмыстарын бастады. Төрт аяқты серіктердің қырағылығының арқасында екі бала да көп ұзамай табылды. Балалар дін аман ата-аналарына тапсырылды. Арада бір күн өткен соң кинологиялық қызметтің көмегі тағы қажет болды. Бұл жолы жоғалғаны – балалар емес, 12 бас жылқыдан тұратын үйір. Материалдық құндылығы жоғары мал белгісіз бағытта жоғалып кеткен. Ізге түскен қызметтік иттер қоршалған құрылыс нысандары орналасқан аумаққа қарай бағыт алды. Кинологтар мен жылқы иесі иттердің соңынан еріп, аптап ыстықта шамамен бір шақырым жол жүрді. Бір сәтте иттер ізден жаңылғандай көрінгенімен, көп ұзамай қайта бағыт алып, алға қарай жүре түсті. Нәтижесінде қоршаудың ар жағындағы жабық аумақта жоғалған жылқы үйірі табылды. Бұл оқиғалар қызметтік иттердің ерекше мүмкіндіктерін ғана емес, олардың адаммен бірлесіп жұмыс істеудегі шеберлігін де көрсетті. Кинологтар төрт аяқты серіктерінің әрбір қимылын бақылап, олардың әрекетіне сүйене отырып іздестіру жұмыстарын жалғастырды. «Кейде адамның көзі көрмегенді иттің мұрны табады» деген сөздің мәні осындай сәттерде анық байқалады. Қызметтік иттер – арнайы дайындықтан өткен кәсіби мамандардың сенімді серігі. Олар із кесу, жоғалған адамдарды табу, есірткі мен жарылғыш заттарды анықтау сияқты маңызды міндеттерді атқарады. Өткен аптадағы үш жағдай да төрт аяқты тәртіп сақшыларының полиция жұмысындағы маңызын тағы бір мәрте көрсетті. Ең бастысы – екі бала ата-анасына аман-есен оралса, жоғалған 12 бас жылқы өз иесін тапты.
Ақпарат көзі : https://www.gov.kz/memleket/entities/mvd-karaganda/press/news/details/1273796?lang=ru
Жауап қалдыру