Өрт қаупі бар кезең басталғалы бері аймақта 115 орман өрті тіркелді. Өңірде өрт қаупі бар кезеңнің қалай өтіп жатқаны туралы @pavlodar.rsk алаңында ТЖ департаменті бастығының орынбасары Қайрат Шаймарденов айтып берді. Қабылданып жатқан барлық шараларға қарамастан, табиғи өрттердің саны артты — мемлекеттік орман қоры аумағында 115 орман өрті тіркелді, ал 2025 жылдың ұқсас кезеңінде бұл көрсеткіш 92 болған еді. Бұдан бөлек, мамандар үш дала өртін және 63 шағын дала өртенуін тіркеді. – Өрт санының артуына басты себеп — жауын-шашын тапшылығымен қатар жүрген неғұрлым ыстық әрі қуаң ауа райы жағдайлары, – деді спикер. – Орман өрттерінің шығу себептерінің арасында құрғақ найзағай басым — 92 жағдай. Бұл ретте 18 өрт тұрғындардың отты абайсыз пайдалануынан, үшеуі өрт қауіпсіздігі талаптарын бұзу салдарынан, тағы екі өрт ауыл шаруашылығы техникасынан шыққан ұшқыннан болған. Құрғақ әрі ыстық ауа райы сақталып отырған жағдайда ТЖД өкілдері ормандар мен далалық аумақтарға барғанда, шөп шабу және ауыл шаруашылығы жұмыстарын жүргізгенде ерекше сақ болуды, сондай-ақ құрғақ өсімдіктерді өртеуге жол бермеуді ұсынады. Фото: ChatGPT
Ақпарат көзі : https://www.gov.kz/memleket/entities/pavlodar-audan/press/news/details/1274197?lang=ru
Жауап қалдыру