Қарағанды облысында жолдардың ұзақ уақыт сақталуын қамтамасыз ету үшін көлік құралдарының осьтік жүктемесін автоматты бақылау жүйесі енгізілуде. Саран – Шахтинск автожолында жұмыс істеп тұрған автоматтандырылған қозғалыс үстіндегі салмақ өлшеу жүйесі (СӨЖ) белгіленген нормадан артық жүк тиеген ауыр көліктерді қозғалысын тоқтатпай-ақ анықтауға мүмкіндік береді.
Бақылау кешені Саран қаласы маңындағы автожолдың 13-шақырымында, теміржол өткелінен кейін орналасқан. Заманауи жабдық фото және бейнетіркеу құралдарымен жарақтандырылған. Бақылау нәтижелері туралы ақпарат жолдың екі бағытында да орнатылған электронды таблолардан көрсетіледі.
Жүйенің тәулік бойы тұрақты жұмыс істеуі үшін жол учаскесіне сыртқы жарықтандыру жүргізіліп, алты жарықтандыру тірегі орнатылған.
Жүйе пайдалануға берілгеннен бергі жеті айда автоматтандырылған жүйе 126 заң бұзушылықты тіркеген.
Жаңа технологияның басты міндеті – көліктердің белгіленген осьтік жүктеме талаптарын сақтауын бақылау ғана емес, жолдардың қызмет ету мерзімін ұзарту. Шамадан тыс жүк тиелген ауыр көліктер жол жабынына түсетін қысымды бірнеше есе арттырып, оның мерзімінен бұрын бұзылуына себеп болады. Соның салдарынан жолдарды күтіп ұстау мен жөндеуге қосымша қаражат қажет.
Биыл облыстық маңызы бар Қарағанды – Шахтинск автожолының «Восточная» байыту фабрикасы маңындағы жол өткелі ауданында тағы бір автоматтандырылған салмақ бақылау жүйесін орнату жоспарланған.
Осылайша, қозғалыс үстінде салмақ өлшейтін автоматтандырылған жүйелер өңірдің жол инфрақұрылымын қорғаудың тиімді тетігіне айналып келеді. Олар заң бұзушылықтарды көлік құралын тоқтатпай-ақ анықтап, ауыр жүктің жол жабынына түсіретін салмағын тұрақты бақылауға мүмкіндік береді.
Ақпарат көзі : https://www.gov.kz/memleket/entities/karaganda/press/news/details/1276882?lang=ru
Жауап қалдыру