Көкшетауда Ш. Уәлиханов атындағы университет базасында Қазақстандағы алғашқы инновациялық бағдарламалау мектебі – Tomorrow School өз жұмысына қабылдау науқанын бастады.
Мектеп білім берудің түбегейлі жаңа peer-to-peer («тең-теңіне») форматын ұсынады. Мұнда дәстүрлі дәрістер, мұғалімдер мен бағалау жүйесі жоқ. Оқу үдерісі тәжірибеге, командалық жұмысқа және нақты IT-жобаларды жүзеге асыруға негізделген.
Студенттер портфолиосына енгізілетін 50-ден астам жоба әзірлеп, еңбек нарығында сұранысқа ие бағыттарды меңгереді. Атап айтқанда, жасанды интеллект (AI), киберқауіпсіздік, Blockchain технологиялары, сондай-ақ Go, JavaScript, Rust және Python бағдарламалау тілдері оқытылады.
Бағдарлама аясында оқу толықтай тегін жүргізіледі. Сонымен қатар қатысушыларға кампус инфрақұрылымын тәулік бойы пайдалану мүмкіндігі беріліп, өзара қолдау көрсететін мықты peer-to-peer қауымдастығы қалыптастырылады.
Оқуға өтінім қабылдау 2026 жылғы 30 маусым мен 31 шілде аралығында өтеді. Қатысушыларды тіркеу (check-in) 31 шілдеде, ал оқу процесі 2026 жылғы 3 тамызда басталады. Оқуға 18 жасқа толған азаматтар қабылданады.
Өтінімді tomorrow-school.ai сайты арқылы беруге болады.
Tomorrow School – Ақмола облысының жүрегінде орналасқан, ынталы жастарға тәжірибеге және командалық жұмысқа негізделген заманауи IT-білім алуға мүмкіндік беретін бірегей білім беру алаңы.
Ақпарат көзі : https://www.gov.kz/memleket/entities/aqmola-digital/press/news/details/1276515?lang=ru
Жауап қалдыру