Алматыда Қоғамдық денсаулық сақтау басқармасының басшысы Марат Пашимовтың қаладағы медициналық ұйымдардың басшыларымен жұмыс кездесуі өтті. Жиында алғашқы медициналық-санитариялық көмек (МСАК) ұйымдарының қызметіне жүргізілген мониторинг нәтижелері таныстырылып, сондай-ақ иммунопрофилактика мәселелері қаралды.
«Алматы қаласы бойынша мониторинг нәтижелері» тақырыбында баяндаманы Республикалық алғашқы медициналық-санитариялық көмек орталығының стратегиялық даму жөніндегі директор орынбасары Амина Оразбаева жасады.
Алматы қаласы Санитариялық-эпидемиологиялық бақылау департаменті басшысының орынбасары Гаухар Каткенова қызылша бойынша эпидемиологиялық жағдай және 2026 жылдың 7 айындағы халықты профилактикалық егулермен қамту көрсеткіштері туралы ақпарат ұсынды.
Қызылша жұқтырғандардың 75,3%-ын 0-ден 4 жасқа дейінгі балалар құрайды. Ауырғандардың едәуір бөлігі вакцина алмаған.
Жиынға қатысушылар бұрын вакцинация алмаған балаларды толықтыра иммундауды жалғастыру, сондай-ақ 6 айдан 10 ай 29 күнге дейінгі балаларды қызылша, қызамық және паротитке қарсы қосымша вакцинациялау қажеттігін талқылады.
Марат Пашимов профилактикалық егулермен нысаналы топтарды қажетті деңгейде қамтуды қамтамасыз етуді, эпидемиологиялық көрсеткіштер бойынша байланыста болған адамдарды вакцинациялауды және халық арасында санитариялық-ағарту жұмыстарын күшейтуді тапсырды.
Сонымен қатар «Әлеуметтік медициналық сақтандыру қоры» КЕАҚ Алматы қаласы бойынша филиалының директоры Ілияс Мухамеджан медициналық ұйымдар жұмысының тиімділігіне жүргізілген талдау нәтижелерін таныстырды.
Кездесу қорытындысы бойынша МСАК жұмысының тиімділігін арттыру және инфекциялық аурулардың алдын алу бағытында алдағы шаралар айқындалды.
Ақпарат көзі : https://www.gov.kz/memleket/entities/almaty-densaulyk/press/news/details/1277744?lang=ru
Жауап қалдыру