Маңғыстауда сотталғандар өз қолдарымен жасаған бұйымдарын көрмеге ұсынды. Көрмеге келгендердің назарына алдымен картиналар түседі. Одан кейін ағаштан, қағаздан жасалған бұйымдар мен өзге де қолөнер туындыларына көз тоқтайды. Ал сол дүниелердің ар жағында уақыт, төзім және адамның өз қолымен бір нәрсе жасауға деген талпынысы тұр.
Маңғыстау облысы бойынша Қылмыстық-атқару жүйесі департаментіне қарасты №77 мекемеде (тергеу изоляторы) «Үміт сәулесі» атты көрме өтті. Сотталғандар өз қолдарымен жасаған бұйымдарын ұсынып, шығармашылық қабілеттері мен еңбегінің нәтижесін көрсетті.
Көрмеге мекеме өкілдерімен қатар Ұлттық превентивтік тетік мүшелері, Қазақстанның адам құқықтары мен заңдылықты сақтау жөніндегі халықаралық бюросының өкілі Александр Муха және Маңғыстау облысы бойынша Адам құқықтары жөніндегі уәкіл Аслан Кужиев қатысты.
Қатысушылардың бірі ағашпен жұмыс істесе, енді бірі қағаздан түрлі бұйымдар жасаған. Кейбірі картина салып, сәндік-қолданбалы өнердің әртүрлі бағыттарын меңгерген. Олар қонақтарға туындыларының жасалу барысын, пайдаланған материалдарын және шығармашылық идеялары туралы айтып берді.
№77 мекеме бастығы, әділет майоры Ғалибек Төлепбергеннің айтуынша, еңбек пен шығармашылық адамның өз еңбегінің нәтижесін сезінуіне мүмкіндік береді.
«Адам өз қолымен бір дүние жасап, оның нәтижесін көрген кезде жауапкершілік пен шыдамдылық қалыптасады. Мұндай дағдылар бостандыққа шыққаннан кейін де қажет болуы мүмкін», – деді ол.
«Үміт сәулесі» көрмесі сотталғандармен жүргізілетін тәрбие жұмысы аясында ұйымдастырылды. Оның мақсаты – шығармашылық қабілеттерді дамыту, еңбекке деген құрметті қалыптастыру, бос уақытты тиімді өткізуге ықпал ету және сотталғандардың қоғамға қайта бейімделуіне жағдай жасау.
Қонақтар көрмені тамашалап қана қоймай, қатысушылармен әңгімелесіп, бұйымдардың жасалу тәсілдерімен танысты. Шығармашылықпен айналысудың адамның бойында дербестік, жауапкершілік пен өз күшіне деген сенімді қалыптастырудағы маңызы атап өтілді.
Сондықтан көрменің «Үміт сәулесі» деп аталуы да бекер емес.
Үміт кейде үлкен сөздерден емес, кішкентай әрекеттен басталады. Қағазға түскен алғашқы сызықтан, ағаштан ойылған бұйымнан немесе өз қолыңмен жасаған дүниеден.
Ақпарат көзі : https://www.gov.kz/memleket/entities/duis-mangystau/press/news/details/1277213?lang=ru
Жауап қалдыру