2026 жылғы 25 тамызда Астана қаласында «Қазақстан кәсіпорындарын ресми экологиялық деректер негізінде ESG-бағалау» тақырыбындағы оқыту курсы өтті. Іс-шараны Қазақстан Республикасы Экология және табиғи ресурстар министрлігінің Қоршаған ортаны қорғаудың ақпараттық-талдау орталығы мен Орталық Азия климаттық қоры бірлесіп ұйымдастырды. Курс Қоршаған ортаны қорғаудың ақпараттық-талдау орталығы базасында офлайн форматта өткізілді.
Курс бағдарламасы ESG саласындағы негізгі мәселелерді қамтыды: халықаралық тәсілдер мен стандарттар, қаржылық емес есептілік, ESG рейтингтері, инвесторлардың талаптары, Қазақстанның ESG саласындағы мемлекеттік саясаты, 2060 жылға дейін көміртегі бейтараптығына қол жеткізу стратегиясы, экологиялық заңнама және табиғат пайдалану тәжірибесі.
Экологиялық құрамдас бөлікке басымдық беретін ESGQ әдіснамасына жеке блок арналды. ESG-дің экологиялық, әлеуметтік және корпоративтік басқару аспектілері, гринвошинг тәуекелдері, салалық ерекшеліктер, индикаторлар жүйесі және ESG-бағалау қағидаттары қарастырылды.
Курстың практикалық бөлігі кәсіпорындарды ресми экологиялық деректер негізінде талдауға арналды. Қатысушылар шығарындылар, төгінділер және қалдықтар көрсеткіштерін, кәсіпорындарды салыстырмалы талдау тәсілдерін, сондай-ақ экологиялық басқарудың күшті және әлсіз жақтарын бағалау әдістерін қарастырды. Сонымен қатар ресми экологиялық ақпаратты ESG-бағалау және салалық тәуекелдерді талдау кезінде пайдалану мәселелері талқыланды.
Курстың авторы және жүргізушісі – Орталық Азия климаттық қорының басшысы, ESG әдіснамасының авторы Ерлік Қаражан.
Курсқа «Eurasian GHG Management» ЖШС, «Almighty Ecology» қоғамдық қоры, «KMF Банк» АҚ, «Өзенмұнайгаз» АҚ, КЗИ Банкі, Қазақстан Республикасы Экология және табиғи ресурстар министрлігінің Экологиялық мәдениет және саясат департаменті, Қазақстан Республикасы Экология және табиғи ресурстар министрлігінің Орман шаруашылығы және жануарлар дүниесі комитеті, сондай-ақ Қоршаған ортаны қорғаудың ақпараттық-талдау орталығы өкілдері қатысты.
Курстың қорытынды бөлімінде практикалық кейстер талқыланып, қатысушылардың сұрақтарына жауап берілді және қорытынды пікір алмасу өтті. Оқу аяқталғаннан кейін қатысушыларға сертификаттар табысталды.
Курс ESG тәсілдерін қолдану, ресми экологиялық деректерді пайдалану және кәсіпорындардағы экологиялық басқару тәжірибесін жетілдіру мәселелері бойынша кәсіби пікір алмасуға мүмкіндік берді.
Ақпарат көзі : https://www.gov.kz/memleket/entities/ecogeo/press/news/details/1280407?lang=ru
Жауап қалдыру