Қарағанды хайуанаттар бағының көпшілікке жақсы таныс тұрғыны, келушілердің сүйікті бегемоты Юджиннің туған күні жыл сайын ерекше аталып өтеді. Өткен жылы 25 жасқа толған Юджиннің құрметіне мерекелік шара ұйымдастырылса, биыл хайуанаттар бағының байырғы тұрғыны 26 жасқа толып отыр.
Хайуанаттар бағының мәліметінше, Юджиннің туған күніне арналған мереке 30 тамыз күні сағат 13:00-де басталады. Қонақтарды эстафеталар мен флешмобтар, викториналар мен көңілді ойындар, сондай-ақ туған күн иесіне арнап сурет салу сияқты қызықты шаралар күтеді. Балалардың көңілін арнайы бойшаң қуыршақтар көтереді. Ал мерекелік бағдарламаның басты оқиғасы – Юджинді көпшілік алдында арнайы тағаммен тамақтандыру рәсімі болмақ.
Юджиннің Қарағандыдағы тарихы жиырма жылдан астам уақыт бұрын басталған. Ол төрт жасында Астанадан жеткізілген. Сол кезде бегемот жеке қолда болған және салмағы шамамен жарты тоннаға жуықтаған.
Арада жылдар өтіп, Юджин нағыз алып жануарға айналды. Қазір оның салмағы үш тоннаға жетеді. Бегемот күн сайын 40 келіден астам жем-шөп жейді. Қазір Юджин үшін хайуанаттар бағында қолайлы жағдай жасалған: оған жазғы және қысқы кезеңге арналған жаңа бассейндер салынған.
Мамандардың айтуынша, бегемоттар зообақта 60 жылға дейін өмір сүре алады. Сондықтан, Қарағанды хайуанаттар бағының сүйікті тұрғыны Юджиннің көрермендерімен бірге өткізер қуанышты күндері әлі де көп.
Ақпарат көзі : https://www.gov.kz/memleket/entities/karaganda/press/news/details/1280006?lang=ru
Жауап қалдыру