Солтүстік Қазақстан облысы полиция департаментіне Айыртау ауданының 35 жастағы тұрғынынан алғыс хат келіп түсті. Тәртіп сақшылары оған скутер сатып алу үшін алдын ала төлем ретінде аударған 50 мың теңгесін қайтаруға көмектескен.
Әйел скутерді сату туралы хабарландыруды танымал интернет-сервистен тапқан. Сатушы ақшаның жартысын алдын ала аударуды сұраған. Алайда төлемді алғаннан кейін онымен байланысқа шықпаған. Осыдан кейін әйел аудандық полиция бөліміне жүгінген.
Алғыс хатында ол жедел уәкіл Алмаз Әлібеков пен тергеуші Асылхан Төлегеновтің мұқият әрі жауапкершілікпен жұмыс істегенін атап өткен. Полицейлердің қарым-қатынасы оның бірден сабырға келіп, көмек көрсетілетініне сенімді болуына ықпал еткен.
Полицейлер сатушыны жедел анықтады. Ол оңтүстік өңірлердің бірінің 18 жастағы тұрғыны болып шықты. Жас жігіт келтірілген шығынды толық өтеді. Өтініш беруші өз талаптарынан бас тартты.
«Қолдауларыңыз бен еңбектеріңіз үшін көп рақмет. Сіздермен бірге өзіңді қауіпсіздікте сезінесің!» — деп жазды ол.
Полицейлер сатушының адалдығына толық көз жеткізбей тұрып, алдын ала төлем жасауға келіспеуге шақырады. Жыл басынан бері СҚО-да хабарландыру сайттары мен әлеуметтік желілер арқылы сауда жасауға байланысты 32 интернет-алаяқтық фактісі тіркелген.
Тәртіп сақшыларының айтуынша, қырағылық — интернет-алаяқтықтан қорғанудың ең сенімді жолы.
Ақпарат көзі : https://www.gov.kz/memleket/entities/mvd-sko/press/news/details/1280560?lang=ru
Жауап қалдыру