Осакаров ауданындағы «Нұрай» балабақшасында кішкентай зерттеушілерге арналған ерекше кеңістік – балалар метеостанциясы ашылды. Енді мектеп жасына дейінгі тәрбиеленушілер табиғат құбылыстары туралы кітаптар мен сабақтардан ғана біліп қоймай, оларды өз көздерімен бақылап, шағын зерттеулер жүргізе алады.
Жаңа алаң облыстық «Жасыл балабақша» жобасы аясында жасақталды.
Мұнда желбағар, компас, термометр, күн сағаты, құстарға арналған жемсалғыш және басқа да қажетті құралдар орнатылған.
Олардың көмегімен балалар күн сайын ауа райын бақылап, температура мен желдің бағытын анықтап, көкжиек тұстарын зерттеп, қоршаған табиғаттағы өзгерістерді бақылай алады.
— Балалар үшін бір нәрсені естіп немесе суреттен көріп қана қою емес, оны өздері жасап көруі маңызды. Мұнда олар ауа райын бақылап, желдің бағыты мен температураны анықтап, компаспен және күн сағатымен жұмыс істей алады. Бұл – бастамасы ғана. Алдағы уақытта алаңды жаңа құрал-жабдықтармен толықтыруды жоспарлап отырмыз, — деді балабақша директоры Райхан Жақыпбекова.
Метеостанцияны ашуға Қазақстандық ағарту, ғылым және жоғары білім саласы қызметкерлерінің салалық кәсіптік одағының Қарағанды облыстық ұйымы көмектесті.
Алаңды жабдықтау жұмыстарына балабақша қызметкерлері де белсенді қатысты.
Биыл балабақшада ашылған жаңа нысанның бірі бұл ғана емес. Ақпан айында мұнда тұз бөлмесі іске қосылды.
Бұл бастаманы қамқоршылық кеңес қолдап, соның арқасында бөлмені қажетті құрал-жабдықтармен қамтамасыз етуге қаржы тартылды. Барлық қажетті жұмыстарды мамандар атқарды.
Тұз бөлмесі ең алдымен маусымдық суық тию ауруларының алдын алу мақсатында пайдаланылады. Балабақша тәрбиеленушілері оған арнайы белгіленген кесте бойынша барады.
— Мұндай бөлме ашуды бұрыннан жоспарлап жүрген едік. Өйткені қыс мезгілінде ЖРВИ-мен ауыратын балалардың саны артады. Ақпан айынан бері мониторинг жүргізіп келеміз, қазірдің өзінде оң динамиканы байқап отырмыз – суық тию ауруларының саны азайды. Балалар үшін бұл әрі жайлы кеңістік. Сеанс кезінде олар тыныш ойнай алады, — деп атап өтті Райхан Жақыпбекова.
«Нұрайдағы» тұз бөлмесі әзірге Осакаров ауданындағы мектепке дейінгі ұйымдар арасындағы жалғыз осындай нысан болып отыр. Ал балалар метеостанциясы аудан балабақшаларында алғаш рет ашылып отыр.
Фото: Осакаров ауданы әкімдігі
Ақпарат көзі : https://www.gov.kz/memleket/entities/karaganda/press/news/details/1281598?lang=ru
Жауап қалдыру