2026 жылы 15 қыркүйек пен 25 қазан аралығында Алматыда кеміргіштерге қарсы күзгі жаппай дәрілеу жүргізіледі. Кеміргіштер мекендейтін ашық аумақтарда жалпы көлемі 47 мың гектардан асатын қоғамдық пайдаланудағы жерлер дәріленеді. Бұл туралы қалалық Коммуналдық инфрақұрылым және тұрғын үй инспекциясы басқармасының өкілдері хабарлады.
Күзгі кезең аясында мамандар жасыл аймақтарды, ашық биотоптарды, кеміргіштердің індерін, арық желілерін, өзендер мен су айдындарының жағалауларын, сондай-ақ қоғамдық көлік аялдамаларының аумақтарын дәрілейді. Жеке сектор тұрғындарына арнайы жем тегін таратылады. Жеммен бірге оны қауіпсіз әрі дұрыс қолдану тәртібі түсіндіріліп, тиісті нұсқаулық беріледі.
Қазақстан Республикасының «Халық денсаулығы және денсаулық сақтау жүйесі туралы» кодексінің 107-бабына сәйкес, жеке және заңды тұлғалар дезинфекция, дезинсекция және дератизация жұмыстарын өз қаражаты есебінен жүргізуге міндетті.
Сол себепті жеке аумақтар, жер учаскелері, ғимараттар мен құрылыстарды дәрілеу жұмыстарын олардың иесі жүргізеді. Көппәтерлі тұрғын үйлердің жертөлелері, шатырлары, баспалдақ алаңдары мен аула аумақтарымен қатар, ортақ мүліктегі дератизация жұмыстары ПИК немесе МИБ қаражаты есебінен жүзеге асырылады. Сондай-ақ, бұл жұмыстарға үй-жайлардың иелері мен жалға алушылары жауапты.
Дәрілеу жұмыстарының тиімділігін арттыру мақсатында заңды тұлғаларға, ПИК, МИБ және басқа да жауапты ұйымдарға қарамағындағы ғимараттар, аумақтар мен қоқыс контейнерлері орналасқан алаңдарда дератизация жұмыстарын қалалық іс-шаралармен бірге жүргізу ұсынылады.
Ақпарат көзі : https://www.gov.kz/memleket/entities/almaty/press/news/details/1285110?lang=ru
Жауап қалдыру