1 қыркүйекте басталған «Жасөспірім бақылауы» жедел-профилактикалық іс-шарасы аясында Солтүстік Қазақстан облысының полиция департаменті әлеуметтік бейнероликтер топтамасын дайындады. Негізгі мақсат – балалар арасында қылмыс, құқық бұзушылықтар мен жазатайым оқиғалардың алдын алу.
Бейнероликтер Петропавл қаласындағы Н.К. Крупская атындағы №10 мектепте түсірілді. Басты кейіпкерлер – 6 «А» сынып оқушылары. Олар полицейлермен бірге ұрлықтың алдын алу, жарақат алу қаупі, буллинг және басқа да өзекті тақырыптарды қозғады. Полицейлердің айтуынша, балалардың шынайы қызығушылығы мен белсенділігі болмаса, түсірілім мұндай әсерлі әрі мазмұнды болмас еді.
Алғашқы бейнероликтердің бірінде маңызды құқықтық мәселе түсіндірілді. Ұрлық – бөтеннің мүлкін жасырын жымқыру, яғни кінәлі адамның мүлік иесінің еркіне қарсы әрекет етіп, оны жасырын иемденуі. Ал бала қалтасынан түсіп қалған ақшаны тауып алып, өзіне иемденсе, бұл ұрлық болып саналмайды. Мұнда қылмыс құрамы жоқ. Алайда табылған затты иемдену заңға қайшы: оны иесіне қайтару немесе полицияға не мектеп әкімшілігіне тапсыру қажет. Қазақстанда ұрлық жасағаны үшін қылмыстық жауапкершілік 14 жастан басталады. Егер бала бұл жасқа толмаған болса, келтірілген залал үшін және оның тәрбиесіне ата-анасы жауап береді.
Жедел-профилактикалық іс-шара барысында полицейлер көтеретін тақырыптар ұрлықпен ғана шектелмейді. Бопсалау, есірткіге байланысты құқық бұзушылықтар және киберқауіпсіздік мәселелері де қамтылады. «Жасөспірім бақылауы» 20 қыркүйекке дейін жалғасады. Дегенмен балалармен профилактикалық жұмыс тұрақты түрде жүргізіледі. Өйткені балалардың қауіпсіздігі – бір реттік акция емес, ұсақ-түйекке дейін мән беруді талап ететін жүйелі жұмыс. Осындай дәйекті қадамдар арқылы өскелең ұрпақтың санасында «Заң мен Тәртіп» қағидаты нығая түседі.
Ақпарат көзі : https://www.gov.kz/memleket/entities/mvd-sko/press/news/details/1286367?lang=ru
Жауап қалдыру