Жұмыскерлерді еңбек міндеттерін орындау кезінде жазатайым оқиғалардан міндетті сақтандыру – өндірістік жарақат, кәсіптік ауру немесе еңбекке қабілеттіліктен айырылған жағдайда азаматқа қаржылай қолдау көрсетудің маңызды тетігі.
📌 2026 жылғы 1 қыркүйектегі жағдай бойынша Қазақстанда өндірістегі жазатайым оқиғалардан 969 қызметкер зардап шеккен. Бұл 2025 жылдың сәйкес кезеңімен салыстырғанда 15,6%-ға көп. Жыл басынан бері 64 топтық жазатайым оқиға тіркеліп, 226 қызметкер зиян шеккен.
Заңнамаға сәйкес, жұмыс беруші әр жұмыскерге міндетті сақтандыру шартын алдын ала жасасуға тиіс. Сақтандыру шарты болған жағдайда, сақтандыру жағдайы туындаған кезде заңда көзделген төлемдер жүзеге асырылады. Қызметкер қайтыс болған жағдайда төлемдер оларды алуға құқығы бар адамдарға беріледі.
⚠️ Маңызды: сақтандыру шартының болмауы жұмыс берушіні жауапкершіліктен босатпайды. Егер жұмыскер сақтандырылмаған болса, тиісті шығындарды жұмыс беруші өз қаражаты есебінен өтеуге міндетті. Оның ішінде емделу, оңалту және жоғалған табысты өтеу мәселелері де жұмыс берушіге жүктеледі.
Сонымен қатар, міндетті сақтандыру шартын жасамаған жұмыс беруші зиянды еңбек жағдайларында жұмыс істейтін азаматтарға арнайы әлеуметтік төлемдерді де өз қаражаты есебінен төлеуге міндетті.
Демек, міндетті сақтандыру – формальды талап емес, жұмыскерді қаржылай қорғаудың нақты тетігі әрі жұмыс берушінің қаржылық және құқықтық тәуекелдерін азайтудың маңызды құралы.
❗ Жұмыскерлерді уақтылы сақтандыру және қауіпсіз еңбек жағдайларын қамтамасыз ету – жұмыс берушінің тікелей міндеті. Ал еңбекті қорғаудың басты мақсаты – жазатайым оқиғалардың алдын алу және олардың болуына жол бермеу.
Ақпарат көзі : https://www.gov.kz/memleket/entities/pavlodar-enbek/press/news/details/1288705?lang=ru
Жауап қалдыру