Мектеп мәзіріне қойылатын талаптар
Дұрыс әрі теңгерімді тамақтану баланың денсаулығын сақтауда, дене бітімінің қалыптасуында, еңбекке қабілеттілігінде және жалпы өзін-өзі жақсы сезінуінде маңызды рөл атқарады. Сондықтан оқушылардың үйде де, білім беру ұйымдарында да құнарлы әрі толыққанды тамақтануын қамтамасыз ету маңызды.
Балалық шақта қалыптасқан дұрыс тамақтану әдеттері адамның өмір бойындағы денсаулығының маңызды негізіне айналады. Осыған байланысты балалардың күнделікті тұтынатын тағамдарының сапасына, тамақтану тәртібіне, тағамдық құндылығына және мәзірдің әртүрлілігіне ерекше көңіл бөлу қажет.
Тамақтану стандартына сәйкес мектеп мәзірі теңгерімді, әртүрлі және балалардың жас және физиологиялық қажеттіліктеріне сай болуы тиіс. Рацион баланы қажетті ақуыздармен, майлармен, көмірсулармен, дәрумендермен, минералды заттармен және басқа да қоректік компоненттермен қамтамасыз етуі қажет.
Мәзірде ақуыздың әртүрлі көздері: ет, құс еті, балық, жұмыртқа, бұршақ тұқымдастар және сүт өнімдері болуы тиіс. Толыққанды және әртүрлі тамақтануды қамтамасыз ету үшін жаңа піскен және маусымдық көкөністер, жемістер, жармалар және басқа да пайдалы өнімдер маңызды орын алады.
Апта ішінде тағамдардың, гарнирлердің, көкөніс және жеміс өнімдерінің, ет, балық және сүт тағамдарының әртүрлі түрлері кезектесіп ұсынылуы тиіс. Бұл толыққанды рационды қамтамасыз етуге және тамақтанудың біркелкілігін азайтуға мүмкіндік береді.
Мәзірді әзірлеу кезінде балалардың жасы, олардың білім беру ұйымында болу ұзақтығы және оқу күнінің тәртібі ескеріледі. Тамақтану оқушыны оқу және дене белсенділігі үшін қажетті энергиямен және қоректік заттармен қамтамасыз етуі тиіс.
Маңызды қағидалардың бірі – рациондағы қант, тұз және шамадан тыс майлардың мөлшерін азайту. Табиғи өнімдерге және құрамында аталған компоненттердің мөлшері оңтайлы болатын тағамдарға басымдық беріледі.
Су ішу тәртібіне де ерекше көңіл бөлінеді. Балалардың қауіпсіз ауызсуды тұтыну мүмкіндігі қамтамасыз етілуі тиіс. Таза, газдалмаған суға басымдық беріледі. Құрамында қанты бар газдалған сусындар мен энергетикалық сусындар балалар үшін пайдалы өнімдерге жатпайды және шөлді басу үшін пайдаланылмауы тиіс.
Рационалды тамақтану – балалардың денсаулығына, олардың толыққанды дамуына, табысты білім алуына және еліміздің болашағына қосқан үлес.
Оқушылардың тамақтану сапасына қамқорлық жасай отырып, біз олардың өсуі мен дамуына қолайлы, қауіпсіз және қолдаушы орта қалыптастырамыз.
Ақпарат көзі : https://www.gov.kz/memleket/entities/departament-kkbtu-pavlodar/press/news/details/1290168?lang=ru
Жауап қалдыру