Бүгін Целиноград ауданында Қоянды ауылы әкімінің сайлауы өтуде. Таңғы сағат 07:00-ден бастап сайлау учаскелері өз жұмысын бастап, дауыс беру құқығына ие ауыл тұрғындары өз таңдауларын жасауда.
Сайлауды ұйымдастыру және өткізу жұмыстарын Целиноград аудандық аумақтық сайлау комиссиясы қамтамасыз етеді. Сайлау науқанына бір аумақтық және үш учаскелік сайлау комиссиясы тартылып, олар Қазақстан Республикасы сайлау заңнамасының талаптарының сақталуын, дауыс беру процесінің ашықтығы мен әділдігін қамтамасыз етуде.
Сайлаушылар тізіміне дауыс беру құқығына ие 6368 азамат енгізілген. Дауыс беру үш сайлау учаскесінде өткізіліп, сағат 20:00-ге дейін жалғасады.
Қоянды ауылы әкімінің сайлауы қолданыстағы әкімнің өкілеттік мерзімінің аяқталуына байланысты тағайындалды. Заңнама талаптарына сәйкес әкім лауазымына үш кандидат тіркеліп, олардың барлығы сайлауға өзін-өзі ұсыну тәртібімен қатысуда.
Тұрғындарды сайлау туралы жан-жақты хабардар ету мақсатында учаскелік сайлау комиссиялары алдын ала сайлаушылар тізімдерін нақтылау жұмыстарын жүргізіп, ауыл тұрғындарына дауыс беру күні, уақыты және сайлау учаскелерінің мекенжайлары көрсетілген шақыру хабарламаларын таратты.
Сайлау учаскелерінде азаматтардың еркін таңдау жасауына барлық қажетті жағдайлар жасалған. Сонымен қатар қоғамдық тәртіпті сақтау шаралары қамтамасыз етіліп, заңнамаға сәйкес байқаушылардың, бұқаралық ақпарат құралдары өкілдерінің және кандидаттардың сенімді өкілдерінің жұмысына қажетті жағдайлар қарастырылған.
Дауыс беру аяқталғаннан кейін учаскелік сайлау комиссиялары дауыстарды санауға кіріседі. Сайлау қорытындылары заңнамада белгіленген тәртіппен аумақтық сайлау комиссиясы тарапынан шығарылады. Сайлау өткізілген күннен бастап жеті күн ішінде аумақтық сайлау комиссиясы сайланған әкімді тіркейді, содан кейін ол өз өкілеттігіне ресми түрде кіріседі.
Ақпарат көзі : https://www.gov.kz/memleket/entities/aqmola-selinograd/press/news/details/1290677?lang=ru
Жауап қалдыру