КЕНТАУДА «АСАРЛАТУ» ТАЗАЛЫҚ ШАРАСЫ ҰЙЫМДАСТЫРЫЛДЫ

Қазақ халқының ежелден келе жатқан дәстүрі – асар адамдарды бір мақсат жолында жұмылып, бір-біріне қолдау көрсетуге үндейді. Бүгінгі «Асарлату» бастамасының да негізгі мақсаты – тұрғындарды ауласын таза ұстауға, қоршаған ортаны абаттандыруға және ортақ іске бірлесе атсалысуға шақыру.

Тазалық шарасы қаладағы Абай көшесі, №4, 4А, 6, 6А көпқабатты тұрғын үйлерінің ауласында өткізілді.

Игі бастамаға қатысқан қала әкімі Жандос Тасов тазалық пен қоғамдық жауапкершіліктің маңызына тоқталып, қала тұрғындарын қоршаған ортаны таза ұстауға белсенді атсалысуға шақырды.

«Бүгінгі бастама – тек тазалық жұмыстарын жүргізу ғана емес. Бұл – өз ауламызға, өз көшемізге, өз қаламызға деген жауапкершілікті арттырып, көршілермен бірлесе әрекет етудің жарқын көрінісі.

Тазалық – бір күндік науқан емес. Ол күнделікті мәдениет пен ортақ жауапкершіліктің нәтижесі. Сондықтан әрбір тұрғынды өз ауласының тазалығына үлес қосып, айналасын көркейтуге, қоршаған ортаны таза ұстауға шақырамын. Біздің мақсатымыз – Кентауды таза, көрікті әрі жайлы қалаға айналдыру», – деді қала әкімі.

Шараға мекеме басшылары, зиялы қауым өкілдері, қала тұрғындары мен жастар белсенді қатысты.

Қатысушылар аумақты күл-қоқыстан тазалап, ағаштарды әктеп, ауладағы орындықтарды ретке келтіріп, абаттандыру жұмыстарын жүргізді.

Сонымен қатар, шара барысында балаларға түрлі сыйлықтар мен балмұздақтар таратылды.

«Асарлату» – тазалықтан басталған татулық пен бірліктің көрінісі.

Таза қала – ортақ міндет.