«Таза Қазақстан» республикалық экологиялық бастамасы мен Дүниежүзілік тазалық күні аясында қала аумағын тазарту және көгалдандыруға бағытталған акциялар өтіп жатыр. Есіл ауданында тұрғын үй аулаларын абаттандыру үшін экологиялық іс-шара ұйымдастырылды, деп хабарлайды Астана әкімдігінің ресми сайты.
Жергілікті тұрғындар мен белсенділер аулаларды көгалдандырып, жайлы ету үшін жұмысқа белсене қатысты.
Экологиялық акция өткен негізгі орындардың қатарында «Инфинити-1» және «Инфинити-2» тұрғын үй кешендері, сондай-ақ «Нова Сити-15» және «Нова Сити-16» тұрғын үй кешендері бар. Мұнда тұрғындар мен волонтерлер жүздеген көшет отырғызды.
Бір ғана «Инфинити» тұрғын үй кешенінің аумағына 100-ден астам ағаш пен 3 мың бұта отырғызылса, «Нова Сити» аумағында акцияға қатысушылар абаттандыру жұмысын жалғастырып, тағы ондаған ағаш пен 750-ден астам бұта екті.
Ұйымдастырушылардың айтуынша, мұндай бастамалар қаланың келбетін көркейтіп қана қоймай, өскелең ұрпақтың қоршаған ортаға ұқыпты қарау мәдениетін қалыптастыруға ықпал етеді. Акцияға қатысушылар жасыл желекке күтім жасау көршілерді біріктіріп, шағынаудандардағы өмір сүруге қолайлы жағдай қалыптастыратынын атап өтті.
Алдағы уақытта отырғызылған өсімдіктерге күтім көрсетіледі. Бұл елорданың суық ауа райы жағдайында көшеттердің тез жерсініп, өсуіне мүмкіндік береді.
#ТазаҚазақстан #экология #TazaChallenge @TazaQazaqstan
Ақпарат көзі : https://www.gov.kz/memleket/entities/astana/press/news/details/1294843?lang=ru
Жауап қалдыру