Алматы қаласы Әділет департаментінде сот орындаушыларының қызметіндегі өзгерістер мен олардың әрекеттеріне шағымдану кезінде міндетті сотқа дейінгі тәртіпті енгізу мәселелеріне арналған дөңгелек үстел өтті.
Іс-шараға Алматы қаласының Жеке сот орындаушылары өңірлік палатасының басшылығы, Әділет департаментінің, қала прокуратурасының өкілдері, сондай-ақ Алматы қаласының Мамандандырылған ауданаралық әкімшілік сотының судьялары қатысты.
Дөңгелек үстел барысында сот орындаушыларының әрекеттеріне шағымданудың міндетті сотқа дейінгі тәртібі жан-жақты қарастырылды. Судьялар шағым беру тәртібін, мерзімдері мен қойылатын талаптарды түсіндіріп, осы санаттағы істерді қарау тәжірибесімен бөлісті. Нақты мысалдар негізінде жиі кездесетін қателіктер мен олардың алдын алу жолдары талқыланды.
Сонымен қатар, қатысушылар заңнамадағы жаңашылдықтар бойынша пікір алмасып, сотқа дейінгі тәртіпті қолданудың практикалық мәселелерін талқылады және алдағы жұмыстың тиімділігін арттыруға бағытталған ұсынымдар әзірледі.
Осындай іс-шаралар мемлекеттік органдар мен кәсіби қоғамдастық арасындағы өзара іс-қимылды нығайтуға, сот актілерін орындау жүйесін жетілдіруге, сондай-ақ азаматтар мен бизнестің құқықтары мен заңды мүдделерін қорғау тетіктерін жетілдіруге ықпал етеді.
Ақпарат көзі : https://www.gov.kz/memleket/entities/adilet-almaty/press/news/details/1295577?lang=ru
Жауап қалдыру