Лавренов Василий Сергеевич–Қазақстан Республикасы Атом энергиясы жөніндегі агенттігі төрағасының орынбасары
Сыбайлас жемқорлыққа қарсы іс-қимыл Қазақстан Республикасының мемлекеттік саясатының маңызды бағыттарының бірі болып табылады. Бүгінде сыбайлас жемқорлық құқық бұзушылықтарын анықтаумен қатар, олардың жасалуына ықпал етуі мүмкін жағдайлардың алдын алуға да ерекше мән беріледі.
Қазақстан Республикасы Атом энергиясы агенттігінің Атомдық қадағалау және бақылау комитетінде (бұдан әрі – Комитет) сыбайлас жемқорлық тәуекелдерін анықтау және барынша азайту, сыбайлас жемқорлыққа қарсы заңнаманың және қызметтік әдеп нормаларының сақталуын қамтамасыз ету, сондай-ақ мүдделер қақтығысының алдын алу бойынша тұрақты негізде жұмыс жүргізіледі.
Негізгі қағидаттардың бірі — шешімдерді алқалылық негізінде қабылдау. Лицензиялар беру үшін құжаттарды қарау кезінде бейінді бөлімшелердің өкілдері қатысады, аттестаттау өткізу барысында Комитеттің әртүрлі құрылымдық бөлімшелерінің өкілдері тартылады. Мемлекеттік бақылау және қадағалау тексерулері мен өзге де іс-шаралар екі немесе одан да көп лауазымды тұлғаның қатысуымен жүргізіледі. Мұндай тәсіл қабылданатын шешімдердің объективтілігін қамтамасыз етуге және адами фактордың ықпалын төмендетуге мүмкіндік береді.
Ең тиімді құралдардың бірі — цифрландыру. Әкімшілік рәсімдерді, есептілікті және аттестаттаудың жекелеген кезеңдерін автоматтандыру, оның ішінде прокторинг технологияларын қолдану процестердің ашықтығын арттыруға, адами фактордың ықпалын азайтуға және объективті бақылаудың қосымша тетіктерін қалыптастыруға мүмкіндік береді.
Қызметкерлер арасында орнықты сыбайлас жемқорлыққа қарсы мәдениетті қалыптастыру да маңызды бағыттардың бірі болып табылады. Түсіндіру жұмыстарын жүргізу, құқықтық сауаттылықты арттыру және әрбір мемлекеттік қызметшінің жеке жауапкершілігі кәсіби әрі адал мемлекеттік қызметті қалыптастырудың маңызды шарттары болып саналады.
Осылайша, сыбайлас жемқорлықтың тиімді алдын алу — ашықтыққа, цифрландыруға, алқалылыққа және жауапкершілікке негізделген кешенді жұмыс. Осы тетіктерді дәйекті түрде дамыту мемлекеттік басқарудың тиімділігін арттыруға және қоғамның мемлекеттік институттарға деген сенімін нығайтуға мүмкіндік береді.
Сыбайлас жемқорлыққа қарсы іс-қимыл әрқайсымыздан басталады — өз міндеттерімізге адал қараудан, заң талаптарын сақтаудан және қабылданатын шешімдер үшін жеке жауапкершілікті сезінуден басталады.
Ақпарат көзі : https://www.gov.kz/memleket/entities/atom-energiyasy/press/news/details/1296477?lang=ru
Жауап қалдыру