Есірткі құралдарын әкелу: қылмыстық жауапкершілік және ерікті түрде тапсыру
Қазақстан Республикасының аумағына есірткі құралдарын, психотроптық заттарды, олардың аналогтарын және прекурсорларын әкелуге тыйым салынады. Халықаралық әуе рейстерінің жолаушыларына ерекше назар аудару қажет. Есірткі құралдарын азаматтық әуе кемелерімен жолаушылардың қол жүгімен де, багажымен де тасымалдауға тыйым салынады.
Есірткі құралдарын Қазақстан Республикасының мемлекеттік шекарасы арқылы заңсыз өткізу контрабанда ретінде саралануы және Қазақстан Республикасының Қылмыстық кодексінің 286-бабына сәйкес қылмыстық жауаптылыққа әкеп соғуы мүмкін. Жауаптылықтың түрі мен мөлшері істің нақты мән-жайларына, заттың түрі мен мөлшеріне, оны өткізу тәсіліне және басқа да саралау белгілеріне байланысты айқындалады. Сонымен қатар, өткізу мақсатынсыз есірткі құралдарын заңсыз дайындау, иемдену, сақтау немесе тасымалдау Қазақстан Республикасы Қылмыстық кодексінің 296-бабында көзделген қылмыстық жауаптылыққа әкеп соғуы мүмкін.
Ерікті түрде тапсыру
Қазақстан Республикасының заңнамасында заңда белгіленген жағдайларда жеке тұтыну үшін алынған есірткі құралдарын, психотроптық заттарды, олардың аналогтарын немесе прекурсорларын ерікті түрде тапсырған адамды қылмыстық жауаптылықтан босату мүмкіндігі көзделген.
Бұл ретте ерікті түрде тапсыру деп құқық қорғау органдарының қызметкерлері затты адамнан мәжбүрлі түрде алып қоюы немесе оны ұстау, тінту және басқа да тергеу әрекеттері барысында анықтауы саналмайды.
Егер тыйым салынған зат әуежайға келгенге дейін анықталса
Егер жолаушы ұшуға немесе тексеруден өтуге дейін өзінде тыйым салынған зат бар екенін анықтап, оны ерікті түрде тапсырғысы келсе, оны жасыруға, лақтырып тастауға немесе қоғамдық жерде қалдыруға болмайды.
Халықаралық әуежайда дереу полиция қызметкеріне, шекара қызметінің қызметкеріне немесе авиациялық қауіпсіздік қызметкеріне жүгініп, тыйым салынған заттың бар екендігін хабарлау қажет. Одан әрі барлық іс-қимылдар уәкілетті органдардың қызметкерлері тарапынан Қазақстан Республикасының заңнамасына сәйкес жүзеге асырылады.
Маңызды! Ерікті түрде тапсыру есірткі құралдарына қатысты жасалған кез келген әрекет үшін автоматты түрде қылмыстық жауаптылықтан босатуды білдірмейді. Құқықтық баға нақты жағдайларға, оның ішінде затты иемдену мақсатына, оның мөлшеріне, тасымалдау тәсіліне және басқа да мән-жайларға байланысты беріледі. Халықаралық рейстердің жолаушыларына қол жүгін және багажын алдын ала тексеріп, шығу тегі немесе заңдылығы белгісіз заттарды тасымалдамау ұсынылады.
Ақпарат көзі : https://www.gov.kz/memleket/entities/kgd-atyrau/press/news/details/1296705?lang=ru
Жауап қалдыру