Павлодар облысының аумағында автомобиль жолдарында жалған мемлекеттік тіркеу нөмірлік белгілерін пайдалануға байланысты фактілердің жолын кесуге бағытталған “Жалған нөмір” жедел-профилактикалық іс-шарасы аяқталды.
Үш күн ішінде жүргізілген тексерулер барысында 500-ден астам әкімшілік құқық бұзушылық фактісі анықталды. Оның ішінде: мемлекеттік нөмірлері оқылмайтын көлік құралын басқарудың 146 фактісі, мемлекеттік нөмірсіз немесе оны пайдалануға тыйым салынғаннан кейін көлік басқарудың 12 фактісі, жалған мемлекеттік тіркеу нөмірлік белгілерімен көлік басқарған 10 жүргізуші және жол қозғалысы ережелерінің өзге де бұзушылықтары анықталды.
Анықталған әрбір факті бойынша көлік жүргізушілеріне қатысты әкімшілік ықпал ету шаралары қабылданды.
Мәселен, Екібастұз қаласында Астана көшесінде ВАЗ 21150 көлік құралы тоқтатылды. Тексеру барысында жүргізушінің көлік құралын көрінеу жалған мемлекеттік тіркеу нөмірлік белгілерімен басқарғаны белгілі болды.
Осыған ұқсас жағдай Солнечный кентінде де тіркелді. Онда Kulager мотоцикл жүргізушісі көлік құралын көрінеу жалған мемлекеттік тіркеу нөмірлік белгілерімен басқарған.
– Жүргізілген талдау көрсеткендей, жүргізушілер көбіне ақылы автомобиль жолдарында жол жүру ақысын төлеуден жалтару мақсатында мемлекеттік нөмірлік белгілерді ауыстыруға немесе жасыруға барады. Сонымен қатар жалған нөмірлер белгіленген жылдамдық шектеулерінен асып кету және жүк көліктерінің салмақтық-габариттік бақылаудан өтуі кезінде нақты салмағын жасыру үшін пайдаланылады. Мұндай әрекеттер жол инфрақұрылымына да, жалпы көліктік қауіпсіздік жүйесіне де зиян келтіреді, – деп атап өтті ведомствода.
Павлодар облысының ПД жалған немесе оқылмайтын нөмірлермен көлік құралдарын пайдаланудың жол қозғалысы қауіпсіздігіне тікелей қауіп төндіретінін атап өтті. Мұндай көліктер құқық бұзушылықтарды тіркеу жүйелерінің жұмысын қиындатып, жазасыздықтың артуына ықпал етеді және жол-көлік оқиғаларының болу қаупін арттырады. ЖПІШ өткізу кезеңінде 52 көлік құралы арнайы тұраққа қойылды.
Ақпарат көзі : https://www.gov.kz/memleket/entities/qriim/press/news/details/1300694?lang=ru
Жауап қалдыру