Павлодар облысының Өңірлік коммуникациялар қызметінің алаңында «Интернет-алаяқтықтың алдын алу» тақырыбында брифинг өтті.
– 2026 жылдың 9 айында Павлодар облысының аумағында интернет-алаяқтық санаты бойынша 1230 қылмыстық құқық бұзушылық тіркелді.
Өткен жылдың осы кезеңімен салыстырғанда тіркелген интернет-алаяқтық фактілерінің саны 472 қылмысқа азайды. Осы кезеңде 162 қылмыстық іс бойынша өндіріс аяқталды, – деп хабарлады Павлодар облысы Полиция департаментінің киберқылмысқа қарсы іс-қимыл басқармасы бастығының орынбасары.
Оның айтуынша, қылмыстың осы түрінің алдын алу мақсатында өңірде профилактикалық іс-шаралар мен халық арасында түсіндіру жұмыстары күшейтілген. Соған қарамастан, қала тұрғындары күн сайын алаяқтардың тұзағына түсіп жатады.
Брифинг барысында спикер интернет-алаяқтықтың алдын алуға бағытталған профилактикалық іс-шаралар туралы мәліметтер ұсынды.
Азаматтардың қырағы болғаны, интернеттегі күмәнді сұраулар мен ұсыныстарға назар аударғаны, сенімді құпиясөздер мен қауіпсіз қосылымдарды пайдаланғаны маңызды.
Полиция департаменті халықтың қаржылық сауаттылығын арттыру және қылмыстардың алдын алу мақсатында түрлі іс-шаралар ұйымдастырады.
Алаяқтықтың қауіпсіздік қызметінің қызметкерлері атынан қоңырау шалу және фишингтік сайттарды пайдалану сияқты схемаларына ерекше назар аудару қажет.
Сондай-ақ полиция балалар мен қарт туыстардың қауіпсіздігіне көңіл бөлудің маңыздылығын атап өтті. Негізгі ереже – асықпау. Алаяқтар көбінесе адамды қысым көрсету арқылы тез шешім қабылдауға мәжбүрлейді: қорқытады, ақшаны шұғыл аударуды немесе кодты хабарлауды талап етеді. Мұндай жағдайда әңгімені тоқтатып, алынған ақпаратты ресми арна арқылы өз бетінше тексерген жөн.
Ақпараттық қауіпсіздікті қамтамасыз етіп, өзіңізді интернеттегі алаяқтықтан қорғау маңызды.
Егер сіз алаяқтардың құрбаны болсаңыз, полиция органдарына жүгініп, шара қолдану туралы арыз беру қажет, – деп қорытындылады спикер.
Ақпарат көзі : https://www.gov.kz/memleket/entities/mvd-pavlodar/press/news/details/1301965?lang=ru
Жауап қалдыру