Қазақстанда стационарлық көмекті жаңғырту бойынша ауқымды бағдарлама жалғасуда. 2026 жылдың басынан бері өңірлерде 475 төсекке арналған 29 жаңа бейіндік бөлімше ашылды.
Денсаулық сақтау министрлігі әкімдіктермен бірлесіп облыстық ауруханаларды жаңғырту бағдарламасын іске асыруда. Оның негізгі мақсаты – мамандандырылған медициналық көмектің пациенттің тұрғылықты жері бойынша қолжетімділігін арттыру.
Жаңа бөлімшелер ең алдымен халықтың қажеттілігі жоғары бағыттар бойынша ашылуда. Бүгінде өңірлерде медициналық көмектің жеті бейіні қосымша дамытылуда. Олар: гастроэнтерология, ревматология, пульмонология, эндокринология, нефрология, гематология және кардиология.
Бейіндік бөлімшелер тапшылығы неге пайда болды?
Жекелеген өңірлерде мамандандырылған бөлімшелер біртіндеп қысқарып немесе жабылып отырды. Бұған, оның ішінде, қаржыландырудың жеткіліксіздігі себеп болды. Бұл ауруханалардың дәрілік заттар мен медициналық бұйымдарды сатып алу, медициналық жабдықтарды жаңарту және бейінді мамандарды тарту мүмкіндігін шектеді.
Жағдайды өзгерту мақсатында 2026 жылғы 1 қаңтардан бастап стационарлық емдеуге арналған тарифтер қайта қаралды. Тарифтерді арттыруға қосымша 93,5 млрд теңге бағытталды.
Жаңа тарифтер медициналық ұйымдарға пациенттерді емдеуге қажетті шығындарды, оның ішінде дәрілік заттармен қамтамасыз ету, медициналық бұйымдар мен шығыс материалдарын сатып алу және медициналық жабдықтарды жаңарту шығындарын өтеуге мүмкіндік береді.
Өңірлерде медициналық көмек алатын пациенттер саны артып келеді
2026 жылдың 8 айында елімізде тәулік бойғы стационар жағдайында 1,7 млн емделген жағдай тіркелді.
Облыстық ауруханалардың бейіндік бөлімшелерінде шамамен 56 мың пациент медициналық көмек алды. Бұл өткен жылдың сәйкес кезеңімен салыстырғанда 5 мың пациентке көп.
Бұл ретте пациенттердің 80%-ға жуығы мемлекеттік медициналық ұйымдарда стационарлық көмек алды. Мамандандырылған медициналық көмек көрсетудің негізгі жүктемесі осы ұйымдарға тиесілі.
Емдеу көлемінің өсуі өңірлерде медициналық көмектің қолжетімділігінің кеңейіп келе жатқанын көрсетеді.
Стационарлық желіні жаңғырту – тек жаңа төсектер ашу емес. Бұл өңір тұрғындары үшін қолжетімділігі шектеулі болған тапшы медициналық бейіндерді қалпына келтіруді және дамытуды білдіреді.
«Біз үшін стационарлық көмектің дамуы ашық төсек санымен емес, адам үшін медициналық көмектің қолжетімділігі қаншалықты жақсарғанымен өлшенуі өте маңызды. Пациент қажетті диагностика мен емді тұрғылықты жеріне барынша жақын жерде алуы тиіс. Өз өңірінде қажетті бейіндік бөлімше болмағандықтан ғана облыстық немесе республикалық орталыққа баруға мәжбүр болмауы керек», – деп атап өтті Денсаулық сақтау министрлігінде.
Ақпарат көзі : https://www.gov.kz/memleket/entities/dsm/press/news/details/1303121?lang=ru
Жауап қалдыру