Астанада Досмұхамедұлы көшесінің Ақжол көшесінен Алаш даңғылына дейінгі аралығында магистральдық техникалық су құбырын қайта жаңарту жұмысы жүріп жатыр. Жаңа су құбырының ұзындығы 3 шақырымнан асады.
Жоба техникалық су беру жүйесінің сенімділігін арттыру және қаладағы кәсіпорындар мен ұйымдардың өсіп келе жатқан қажеттілігін қамтамасыз ету мақсатында жүзеге асырылып жатыр. Қолданыстағы су құбыры 20 жылдан астам уақыт бойы пайдаланылып келеді.
Бұл желі арқылы 80-ге жуық ұйым мен кәсіпорын, оның ішінде №1 жылу электр орталығы, «Астана-Тазалық» және басқа да өнеркәсіп нысандары техникалық сумен қамтылады.
Қазіргі таңда құрылыс жұмысының 85%-ы орындалды.
Су құбырын қайта жаңарту қажеттілігі, ең алдымен, тұтынушылар санының артуы мен техникалық суды тұтыну көлемінің ұлғаюына байланысты туындап отыр. Астана қарқынды дамып, өндірістік және коммуналдық инфрақұрылымы кеңейіп келеді. Бұл қолданыстағы желілерге түсетін қосымша күшті арттырады.
Қайта жаңарту жұмысы аяқталғаннан кейін 80-ге жуық ұйым жаңартылған үш шақырымдық магистраль арқылы техникалық сумен қамтылады. Бұл жүйенің сенімділігі мен өткізу қабілетін арттыруға мүмкіндік береді.
Ақпарат көзі : https://www.gov.kz/memleket/entities/astana/press/news/details/1307522?lang=ru
Жауап қалдыру